भांगरभूंय | प्रतिनिधी
दुचाकी चालक तरणाटे आड कागाळ
म्हापशें: शिरसयंत रेल्वे पुलार दुचाकीन मोटारीक धपको दिल्ल्यान जाल्ल्या अपघातांत जखमी सानिया संजय मोने (19, तीर्थ बाग, मयें) हिका उपचारा वेळार मरण आयलें. ह्या प्रकरणांत कोलवाळ पुलिसांनी दुचाकी चालक तरणाटे आड गुन्यांव दाखल केला.
हो अपघात फाटल्या 26 जानेवारी दिसा रातच्या 9 वरांच्या सुमाराक शिरसयंतल्या झरापकार पेत्रोल पंपा कुशीक रेल्वे पुलार घडलो. मयत सानिया मोने ही आपल्या तेजश्री जोशी (मुळगांव) हे इश्टिणी सयत शिरसय सावन दिवचलचे दिशेन जीए 04 पी 0276 क्रमांकाचे अॅक्टिवा स्कुटरी वेल्यान वताली.
ही दुचाकी घडणूक थळार रेल्वे पुलार पावतकूच विरोधी दिशेन वचून मुखा वेल्यान येवयी जीए 08 के 5938 क्रमांकाचे हुंडाय आय ट्वेन्टी मोटारीक धपको दिलो. ही मोटार हेरंब बांदेकार (म्हापशें) चलयताले.
मोटारीक धपको बसतकूच दुचाकी फाटल्यान बशिल्ली मयत सानिया ही रस्त्यार पडून गंभीर जखमी जाली. म्हापशेंच्या जिल्हो हॉस्पिटलांत उपचार घेतले उपरांत तिका फुडल्या उपचारा खातीर गोमॅकाँत दाखल केली. थंय उपचार सुरू आसतना सोमारा 5 फेब्रुवारी दिसा तिका मरण आयलें.
ह्या अपघात प्रकरणांत कोलवाळ पुलीस हवालदार हरीश रेडकार हांचे कागाळीच्या आदारान दुचाकी चालक तेजश्री जोशी हिचे आड भादंसंच्या 279, 338, 336 आनी 304 अ कलमा खाला निश्काळजीपणान वाहन चलोवन सदोश मनीसवधाचो गुन्यांव पुलिसांनी नोंद केला. फुडलो तपास पुलीस उपनिरिक्षक भरत खरात करतात.
मजगतीं, मयत सानिया मोने हें पर्वरे विद्या प्रबोधिनी म्हाविद्यालयांत बीए बीएड फांट्यांत शिक्षण घेतालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
