भांगरभूंय | प्रतिनिधी
फोंडें: गोवा डेरीच्या संचालक मंडळांत सेगीत पोरणेच लोक वेंचून येतात. संचालक मंडळांत नव्या लोकांक संद दिवपाची सामकी गरज आसा. गोवा डेरीची अर्थीक स्थिती खालावल्या तरी सरकारान नेमणूक केल्ली प्रशासक समिती बरें काम करता अशें दूद उत्पादक रमेश हेडताड हांणी पत्रकार परिशदेंत सांगलें.
फोंड्या मंगळारा घेतिल्ले पत्रकार परिशदेंत गोविंद नायक आनी गुरूदास परब हे दूद उत्पादक हाजीर आशिल्ले.
गोवा डेरीचे सेगीत लुकसाणींत आशिल्लो गोरवां खावड प्रकल्प प्रशासक समितीन बंद केला. सुमार 13 कोटी रुपया खूबश्या साहित्याची पुरवण केल्ल्या विक्रेत्यांक दिवपाचे बाकी आसात. प्रशासकी समिती आनी सरकारान गोवा डेरी परतून रुळार हाडपा खातीर यत्न सुरू केल्यात. पूण स्वता जापसालदार आशिल्ले दूद उत्पादक गोवा डेरीच्या कारभाराक सरकाराक आनी प्रशासकी समितीक जापसालदार धरीत आशिल्ल्याचें रमेश हेडताड हांणी सांगलें.
गोवा डेरींत दरेक सहकार मंत्र्यांनी स्वताच्या कार्यकर्त्यांची केल्ली नोकर भरती सद्या मारक थारल्या. गरजे भायर केल्ले नोकर भरतीक लागून गोवा डेरीक पगारा खातीर अदीक खर्च करचो पडटा. ताका लागून फुडारांत दूद उत्पादकांनी नव्या लोकांक संचालकक मंडळाचेर वेंचून दिवपा खातीर यत्न करूंक जाय अशें रमेश हेडताड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
