भांगरभूंय | प्रतिनिधी
पणजी, प्रतिनिधी : कला आनी संस्कृती मंत्री गोविंद गावडे परतून एक फावट संकश्टांत सांपडूं शकतात. हालींच ते कला अकादमीचें नुतनीकरण, कला आनी संस्कृती खात्याच्या निधी प्रकरणा खातीर चर्चेंत आशिल्ले. आतां तांचो एक ऑडीयो सोशल मिडियाचेर व्हायरल जाला. तातूंत ते प्रियोळ मतदारसंघांतले एके कार्यावळी वयल्यान आदिवासी कल्याण संचालक दशरथ रेडकार हांकां शिटकायतना आयकूंक येता.
कांय दिसां आदीं अनुसूचीत जाती आनी अनुसूचित जमाती आयोगान फोंडेचे ‘सेवा’ हे आपसेवी संस्थेच्या सहकार्यान प्रियोळ मतदारसंघांत म्हाड्डोळा एके कार्यावळीचें आयोजन केल्लें. आदिवासी कल्याण खात्याच्यो येवजण्यो लोकां मेरेन पावपाच्या हेतान हे कार्यावळीचें आयोजन केल्लें. मात, हे कार्यावळींत थळावे सरपंच, प्रियोळचे आमदार तशेंच मंत्री गोविंद गावडे हांकां आमंत्रण नाशिल्लें. ह्या विशया वयल्यान मंत्री गावडे हांणी रेडकार हांकां कार्यावळीचे आदले दीस फोन केल्ल्याचें ऑडिओंतल्यान कळटा.
आतां ओगी रावचे नात
आपल्या मतदारसंघांतली कार्यावळ आपणाक तशेंच थळाव्या लोकप्रतिनिधींक कळयनासतना तुमी मुद्दम आयोजित केल्यात, हें म्हज्या लक्षांत आयलां…… हें तुमी मुख्यमंत्री डॉ. प्रमोद सावंत आनी सभापती रमेश तवडकार हांकां वचून सांगात. प्रेरणा दिन कार्यावळींतूय आदिवासी कल्याण खात्याक ‘उटा’ चळवळीचो उगडास ना. तेन्ना आमी ओगीच रावले. मात, आतां ओगी रावचे नात, अशें ऑडिओंत मंत्री गावडे हे संचालक दशरथ रेडकार हांकां शिटकायतना आयकूंक येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
