भांगरभूंय | प्रतिनिधी
पालिकेक आयली जाग; लादी घालून पुरयलो बुराक
म्हापशें: सिरसाट इमारतीच्या फुटपाथाचे कुशीच्या गटारा वेली काँक्रीट लादी फुटिल्ल्यान बुराक पडिल्लो. ह्या बुराकांत एक जाण्टो मनीस पडून जखमी जालो. हे घडणुके उपरांत म्हापशें पालिकेक जाग आयली आनी सांजवेळा त्या गटाराचेर लादी घालून तें धांपलें.
गटाराक बुराक पडपाची घडणूक फाटल्या बुधवारा 31 जानेवारीक घडिल्ली. हो प्रकार 1 फेब्रुवारी दिसा कांय नगरसेवकांनी पालिका मुख्याधिकारी आनी नगराध्यक्षा सयत कर्मचाऱ्यांचे नदरेक हाडून दिल्लो. पूण तरी लेगीत फाटले पांच दीस पालिकेन गटारा वेले फुटिल्ले सुवातेर नवी लादी घालपाची कसलीच तकालस घेतली ना.
काल (सोमारा) दनपारां 12 वरांच्या सुमाराक एक जाण्टो मनीस फुटपाथ हुपून रस्त्यार वचपाचो यत्न करीत आशिल्लो. पूण गटारा वेली लादी फुटून तयार जाल्ल्या बुराकाचो अदमास तांकां आयलो ना आनी ते सरळ त्या बुराकांतल्यान गटारांत पडले. रोखडेंच आशिकुशीच्या लोकांनी घडणूक थळार धांव घेवन त्या जाण्ट्या मनशाक गटारांतल्यान भायर काडलो. तांकां ह्या अपघातांत किरकोळ जखम जाली.
हे घडणुकेची म्हायती मेळ्ळे उपरांत पालिका कर्मचाऱ्यांनी रोखडीच धांवपळ केली आनी सांजवेळा त्या गटाराचेर लादी घालून तो बुराक पुरयलो. ह्या एकंदरीत पालिकेच्या कारभाराचेर नागरिकां सयत नगरसेवकांनी तिडक उक्तावन गटाराचेर लादी घालून धांपपा खातीर गटारांत कोणतरी पडपाची गरज आसा काय कितें? असो प्रस्न उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
