भांगरभूंय | प्रतिनिधी
पणजी: दिल्लीचे मुख्यमंत्री अरविंद केजरीवाल हांचे आड 2017 वर्साचे विधानसभा वेंचणुके वेळार वेंचणूक आचारसंहितेचो भंग केल्ल्या प्रकरणांत न्यायालयांत खटलो सुरू आसा. हो खटलो रद्द करपा खातीर केजरीवाल हांणी गोंय खंडपिठांत याचिका दाखल केल्या. हे याचिकेचेर आयज (मंगळारा) सुनावणी जातली.
आम आदमी पक्षान म्हापशेंच्या टॅक्सी स्टॅण्डार 8 जानेवारी 2017 दिसा पक्षाचे फुडारी आनी दिल्लीचे मुख्यमंत्री अरविंद केजरीवाल हांची प्रचारसभा आयोजीत केल्ली. हे प्रचार सभेंत ‘हेर पक्षां कडल्यान पयशे घेयात, पूण मत मात आम आदमी पक्षाक दियात’ अशें आवाहन मतदारांक केल्लें.
ह्या प्रकरणांत तेन्नाचे निर्वाचन अधिकारी गुरूदास देसाय हांणी केजरीवाल हांचे आड सुदारीत वेंचणूक आचारसंहितेचो भंग केल्ल्याची कागाळ दाखल केल्ली. उपरांत हाची दखल घेवन म्हापशेंच्या पयलो वर्ग न्यायालयांत 5 फेब्रुवारी 2018 दिसा सुनावणी सुरू केली.
हे सुनावणेक केजरीवाल हाजीर रावत नाशिल्ल्यान केजरीवाल हांकां हजर रावपा खातीर म्हापशें न्यायालयान समन्स बजायिल्ले. अशें आसतना न्यायालयांत सुनावणेक हाजीर रावनासतना केजरीवाल हांणी गोंय खंडपिठांत याचिका दाखल करून वयलो खटलो रद्द करपाची मागणी केली. तशेंच उच्च न्यायालयांत सुनावणी सुरू आसतना वयलो खटलो स्थगीत दवरपाची मागणीय केल्या. ह्या प्रकरणाची मंगळारा 6 वेर सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
