भांगरभूंय | प्रतिनिधी
पणजी, प्रतिनिधी: पाद्रीभाट नेसाय मालमत्तेच्या वादांत काकीचो खून केल्लो दुबावीत मारियो ओलिव्हेरा हो साक्षीदारांचेर चेंपण हाडपाची शक्यताय आशिल्ल्याचें निरीक्षण नोंद करून मडगांवच्या दक्षीण गोंय जिल्हो आनी सत्र न्यायालयान ताचो जामीन अर्ज भायर मारलो.
हे विशीं मायणा – कुडतरी पुलिसांनी ८ जानेवारी २०२४ दिसा गुन्यांव दाखल केल्लो. ते प्रमाण, पाद्रीभाट नेसाय हांगा मालमत्तेच्या वादांतल्यान आयतार ७ जानेवारीक रातचीं पावणे इकराच्या सुमाराक दुबावीत मारियो आलिव्हेरान काकी फ्लोरेंटिना फर्नांडीस (५३) हिचेर चाकवान वार केल्लो. उपरांत तिका मडगांवच्या दक्षीण गोंय जिल्हो हॉंस्पिटलांत मरण आयलें.
हे विशीं मायणा – कुडतरी पुलिसांनी दुबावीत मारियो ओलिव्हेरा हाचे आड खुनाचो गुन्यांव नोंद करून तपास सुरू केलो. हाचे मजगतीं घडणुके सुवाते वयल्यान पळ काडिल्लो दुबावीत मारिओक पुलिसांनी मोबायल लोकेशना वरवीं ट्रेस करून अटक केली. उपरांत ताका पुलीस बंदखणी खातीर न्यायालयांत हाजीर केलो. तेन्ना ताका पयले १० दीस पुलीस बंदखण फर्मायली. ती सोंपल्या उपरांत ताका न्यायालयीन बंदखण फर्मायली.
मजगतीं, दुबावीत मारियोन मडगांवच्या दक्षीण गोंय जिल्हो आनी सत्र न्यायालयांत जामीन अर्ज दाखल केलो. हातूंत ताणें आपूण ही घडणूक घडल्या उपरांत पुलिसांचे सुवादीन जाल्ल्याचो दावो केलो. तशेंच पुलिसांनी हल्लो केल्लो तेन्ना वापरिल्ले शस्त्र जप्त केलें. तशेंच गोंयकार आशिल्ल्यान जामिनाचेर सुटका केल्या उपरांत पळून वचपाचो प्रस्न येना असो दावो करून जामिनाचेर सुटका करपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
