भांगरभूंय | प्रतिनिधी
आमची बदलपी जिणे पद्दत जायत्या दुयेंसांक आमंत्रण दीत आसता. फाटल्या दशकांत काम करपी बायलांचे जिणे पद्दतींत खूब बदल घडल्यात. कामाचो सतत ताण आनी सिगारेट ओडपाची संवयेक लागून बायलांक जायतीं दुयेंसां जावपाक लागल्यांत. ही संवय खूब धोक्याची जावं येता आनी सिगारेट ओडपी बायलांक हेर बायलां परस काळजाचो आताक येवपाची शक्यताय चड आसता अशें संशोधनांतल्यान स्पश्ट जालां.
ताज्या अहवाला प्रमाण, फकत दादलेच न्हय, तर बायलोय काळजाच्या दुयेंसांक बळी पडटात. फाटल्या कांय वर्सांत बायलां मदीं सिगारेट ओडपाची संवय वाडतूच आशिल्ल्यान बायलांचें फुफूस दुबळें जावपाक लागलां. तशेंच काळजाच्या कार्याचेरूय परिणाम वाडत आसा, जाका लागून काळजाच्या दुयेंसांचो धोको वाडटा. काळजाच्या दुयेंसाचे कांय सामान्य घटक आसात, दादल्यांक पिरायेच्या ४५ वर्सां उपरांत आनी बायलांक पिरायेच्या ५५ वर्सां उपरांत काळजाच्या दुयेंसांचो धोको वाडटा. हाचे वांगडाच काळजाच्या दुयेंसाचो इतिहास आशिल्लीं कुटुंबां, चड सिगारेट ओडपी, हाय ब्लड प्रेशर, गोडेंमूत आनी विस्कळीत जिणे पद्दत आशिल्ल्यांक काळजाच्या दुयेंसांचो धोको वाडटा.
सिगरेटाच्या धुंवराक लागून रगत गोठेवपाची प्रवृत्ती वाडटा. हाका लागून काळजाच्या शिरांतल्यान ऑक्सिजनयुक्त रक्ताचे पुरवणेचेर परिणाम जाता. जाका लागन चड सिगारेट ओडप्यांक अचकीत काळजाचो आताक येता.
सिगरेट ओडिल्ल्यान बायलांक काळजाचो आताक येवपाचें प्रमाण वर्सां वाडटा. २० ते ३५ वर्सां पिरायेच्या बायलां मदीं अश्योे केशी जातात. सिगरेटी ओडल्यार बायलां मदीं वांझपण, हार्मोनांत बदल, पीसीओडी, थायरॉयड आनी गर्भपात ह्यो समस्या वाडल्यात. तशेंच फुफ्फुसां संबंदीत समस्या आनी ताण सारकिल्ल्यो मानसीक समस्या वाडल्यात. धुम्रपान केल्यार काळजाचो आताक येवपाचो धोको तिप्पट जाता अशें अहवालांत स्पश्ट केलां, देखून बेगीनांत बेगीन सिगरेट ओडपाचें सोडचें अशें दोतोर सांगतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
