भांगरभूंय | प्रतिनिधी
गोंयाक 30 मे 1987 वर्सा घटक राज्याचो दर्जो फावो जालो. ह्या काळांतल्यान गोंयच्या राजकारणाची दिशा बदल्ली. सुरवातेचो काळ मगो पक्षा कडेन बरींच वर्सां सत्ता उरली. भाऊसाहेब बांदोडकार हांणी भूसुधारणांक पयलें प्राधान्य दिलें. कुळ, वहिवाटदार कायदो हाडून कुळांक अधिकार दिवपाची प्रक्रिया सुरू जाली. ते उपरांत शशिकला काकोडकार हांणी मुंडकार संरक्षण कायदो हाडलो. ‘कसेल त्याची जमीन’ ह्या तत्वाचेर लोकांक न्याय दिवपाचें यत्न सुरू जाले. पूण घटक राज्या उपरांत गोंयच्या सत्तेचीं सुत्रां राश्ट्रीय पक्षां कडेन गेलीं. गोंय राष्ट्रीय पांवड्यार सदांच एक पर्यटनाचें आकर्शण थारिल्ल्यान गोंयच्या जमनींचेर गिरेस्त लोकांची नदर पडली. जमीन होच गोंयच्या राजकारणाचो मुखेल विशय थारलो आनी ते नदरेंतल्यानूच नव्या बिल्डर लॉबींचे प्रतिनिधी राजकारण्यांचो भेस घालून राजकारणांत देंवले.
वेंचणुके वेळार लोकांचेर पयसो खर्च करून लोकांक बांदून घेवप आनी मागीर सत्तेर येतकूच जमनींच्या वेव्हारांतल्यान ते पयशे व्याजा सयत वसूल करून घेवप हो आयच्या राजकारणाचो मंत्र थारला. चडशा आमदारांचो जोड धंदो हो जमनीच्या संबंदीचो आसा हे वेगळें सांगपाची गरज ना. गोंय मुक्ती सावन आयज मेरेन जमनी भोंवतीच राजकारण घुंवता. जमनीचे वेव्हार करपी बिल्डरांचे एजंट म्हूण राजकारणांत वावुरपी फुडारी महसूल आनी नगर नियोजन खात्यांचे मंत्री जातात. हें दोळ्यां मुखार आमी पळयत आसतनाच हें सरकार अंत्योदय तत्वाचीं बातां कशीं मारूंक शकता? एकी कडेन सामाज कल्याणकारी येवजण्यांच्या नांवान सर्वसामान्य लोकांक घुंवळावन उडोवप आनी दुसरी कडेन सत्तेच्या नेटार जमनींचे वेव्हार करून आनी जमनी रूपांतरीत, अकृशक आनी सेटलमेंट करून आपल्यो पोटल्यो भरप हो एक व्हडलो धंदो राजकारणांत सुरू आसा. हें अशेंच चालू रावलें जाल्यार एक दीस आमी गोंयकार आमचेच भूयेंतल्यान भायरे जावपाक वेळ लागचो ना, हे सांगपाक म्हाका दिसता कोणा भविश्यकाराची गरज ना.
केंद्रीय भाजपान दिली देशाक दिशा
कोणाचेय कितलेय जरी विचार मतभेद आसले तरी केंद्रांतल्या भाजपा सरकारान पुरायपणान देशाच्या वाटचालीक आनी फुडाराक एक दिशा मेळोवन दिली, हें कोणूच न्हयकारपाक शकना. देशांतली समाजीक जीण, अर्थीक रचना आनी हेर कितल्याश्याच गजालींचो खोलायेन अभ्यास करून कितल्योश्योच येवजण्यो आनी कार्यावळी केंद्र सरकारान सुरू केल्यात. आतां राज्यांतलीं सरकारां जरी त्या विशीं जागरूक नात वा गंभीर नात जाल्यार केंद्राचो कितें दोश? फाटल्या काँग्रेस सरकारच्या तेंपार शारी विकासा खातीर त्या वेळच्या सरकारान जुनरूम ही येवजण तयार केल्ली. शारांची फेरमांडणी, झोपडपट्ट्यांची पुर्नउभारणी आनी हेर शारांच्या नियोजित विकासाचो आसपाव तांतूत आसलो. गोंयांत मात राजकी इत्साशक्तीच्या उणावा खातीर ही येवजण चालीक लागूंक शकूंक ना. ते वेळार पणजी शाराची निवड जाल्ली, पूण सर्गेस्त मनोहर पर्रीकारानूय हे येवजणे कडेन गंभीरपणान पळोवंक ना. आयचे घडयेक स्मार्ट सिटीच्या नांवान पणजेंतल्या विकासा कडेन पळयत जाल्यार ह्या कामांच्या बदल्यांत कंत्राटदारां कडल्यान कमिशन खाल्ल्यान आतां ह्या कामांचेर कोणाचेंच नियंत्रण ना तें स्पश्टपणान दिश्टी पडटात.
वाड जाल्या, तर…..
राज्यपाल पी. एस. श्रीधरन पिल्लई हांच्या अभिभाशणांतल्यान शुक्रारा अर्थसंकल्पीय अधिवेशनाक सुरवात जाली. राज्यपालांच्या अभिभाशणान कितल्याश्याच गजालींचो आसपाव जाला. सरकारान केल्ल्या कितल्याश्याच कामांची वळेरीच तांणी सादर केल्या. सरकार कांयच करीना अशें म्हणपी विरोधकांच्या तोंडारूच ही कामां सरकारान अभिभाशणाच्या निमित्तान मारल्यात अशेंय म्हणूं येता. डबल इंजिन सरकार सत्तेर आयल्या उपरांतूच राज्याच्या विकासाक खऱ्या अर्थान चालना फावो जाल्या, असोय दावो सरकारान या अभिभाशणांतल्यान केला. आतां ह्या सगल्या सरकारी येसाच्या गजालींचो नियाळ घेयत जाल्यार ही आंकडेवारी बरेंच कितें सांगता. सरकार आपल्या वटेन बरेंच काम करता पूण तातूंतल्यान गोंयचो फुडार बऱ्याक वयता काय कितें, हाचेर विचार करचो पडटलो. एकी कडेन सरकार म्हणटा दरडोई उत्पन्नात 30 टक्के वाड जाल्या आनी दुसरी कडेन हेंच सरकार सामाजिक येवजण्यांचेर कोटयांनी रूपया खर्च करता हेंवूंय बी सांगता. गोंयांतली गरीबी खरीच कमी जाल्या जाल्यार दयानंद सामाजिक येवजणेंच्या लाबार्थ्यांचो आंकडो देंवूंक नाका आसलो? गृहआधार येवजणेंचो लाव 1 लाख 34 हजार बायलांक मेळटा. 80 हजार चलयांक लाडली लक्ष्मी येवजणेचो लाव मेळ्ळा. इतलेंच न्ही तर अंत्यसंस्कार येवजणे खाला 449 लोकांक सहाय्यता मेळ्ळ्या. ते भायर 5 लाख लोकांक रेशनधान्याचो लाव जाता. 30 टक्के लोकांच्या उत्पन्नांत वाड जाल्या, जाल्यार ही आंकडेवारी नेमकी कितें दाखयता हाची जाप सरकारान ना जाल्यार धोरणकर्त्यांनी दिवपाची गरज आसा.
आवास येवजण गोंयांत कित्याक ना?
गोंय विधानसभा अधिवेशनाच्या आदल्या दिसा म्हटल्यार ब्रेस्तारा केंद्रीय अर्थसंकल्प सादर जालो. त्या अंतरिम अर्थसंकल्पांतूय बी देशाचो फुडार उज्ज्वल थारोवपी चित्र अर्थमंत्री निर्मला सितारमण हिणें चितारलां. हातूंत प्रधानमंत्री आवास येवजण, ग्रामीण आनी शारी हांचोय आंकडो दिला. तशेंच 2021 ह्या वर्सा सावन प्रधानमंत्री स्वामित्व येवजण केंद्र सरकारान चालीक लायल्ली. खरें म्हटल्यार ह्यो दोनूय येवजण्यो गोंयकारां खातीर खुबूच म्हत्वाच्यो आसल्यो. गोंयकारांच्यो जमनी आनी घरांची मालकी आजूनूय बी हुमकळटा आनी गोंयांत जमनीचे दर बिल्डर लॉबींनी वाडयल्ल्यान गोंयकारांक घरां बांदप आनी नवी घरां, फ्लॅट विकत घेवप शक्य जायना. अशा वेळार प्रधानमंत्री आवास येवजणेचो लाव शारी आनी ग्रामिण लोकांक मेळोवंन दिवपाक राज्य सरकारान यत्न करपाची गरज आसली. स्वामित्व येवजणेंतल्यान ग्रामीण भागांतल्या लोकांक घरांची कायदेशीर कागदां आनी प्राॅपर्टी कार्ड फावो जातलें आसलें. हे कार्ड मेळ्ळ्यार घर दुरूस्ती आनी नवें घर बांदपाक बँकांचें रिण मेळोवप शक्य जातलें. ह्या दोनूय येवजणेंचेर राज्यांतल्या भाजप सरकारान कित्याक आडनदर केल्या आनी ह्या दोनूय येवजणेंचेंर कोणूच कित्याक भाश्य करिनांत हेंच कळना. सरकारान घरां बांदून दित जाल्यार बिल्डरांचें म्हत्व कमी जातलें. बिल्डरांचे फ्लॅट कोण घेतलो विकत? राजकारण्यांच्या एजंटांचे प्लॉट आनी फ्लॅट कोण घेतलें विकते? स्वामित्व येवजणे खाला ग्रामीण भागांतल्या लोकांक तांच्या घरांची मालकी आनी जमनीची कागदपत्रां मेळत जाल्यार हे लोक खऱ्या अर्थान आत्मनिर्भर जातले. मागीर ह्या फुडाऱ्यांच्या फाटल्या फुडल्यान नाचपाक कोण येतलो, अशी भिरांत ह्या फुडाऱ्यांक दिसता काय कितें? हे घटक जाले पवित्र
प्रधानमंत्री नरेंद्र मोदी हे 6 फेब्रुवारीक गोंयांत येवपाचे आसात. ते खरें म्हटल्यार एका सरकारी कार्यावळीक येवपाचे आसात, पूण तांच्या गोंय भेटीची संद सादून भाजपान मडगांवा तांची भौशीक सभा घेवपाचें थारायलां. हे सभेंत गेल्या धा वर्सांचे कामगिरीचो अहवाल सादर करतले अशें मुख्यमंत्री डॉ. प्रमोद सावंत हांणी म्हटलां. मुख्यमंत्री डॉ. सावंत हांणी साबार मळांचेर काम केलां. स्वयंपूर्ण गोंय येवजणेंतल्यान कितल्याश्याच लोकां मेरेन सरकारी येवजण्यांचो लाव पावयला, पूण ह्यो दोन म्हत्वाच्यो येवजण्यो लोकां मेरेन कित्याक पावोंक शकूंक ना, हाचो विचार मुख्यमंत्री डॉ. सावंत हांणी करचो. प्रधानमंत्री मोदी हांणीय बी या दोन येवजण्यांचेर गोंय कित्याक लागून फाटीं उरलां, ताची जाप भाजपा कडल्यान घेवची. कोण कोण फुडारी या सरकारान बिल्डर लॉबीचे प्रतिनिधी म्हूण काम करतात आनी जमनीच्या विशयाचेर कश्यो फायली आडकतात आनी कसो पयशांचो वेव्हार जातां, हाचोय तपास प्रधानमंत्री मोदी हांणी करचो. ‘सब का साथ, सब का विकास, सब का प्रयास’ हो भाजपाचो मंत्र जावन आसा. पूण काँग्रेसींतल्यान भ्रश्टाचार करून आतां भाजपांत येवन परतून भ्रश्टाचार करपाक सुरवात केल्ल्या ह्या घटकांक पवित्र करून घेवन काँग्रेसीची भ्रश्टाचाराची परंपरा भाजप फुडें व्हरपाक सोदता काय कितें, असो प्रस्न करचोच पडटल्लो. पयलीं परस चड भ्रश्टाचार करपाक आतां हे फुडारी शिकले. काँग्रेसींत आसतना तांकां मात्शी तरी लज दिसताली आनी आतां मात ते कोणाकूच भिनात. हातूंतल्यान कितें समजप? ‘काँग्रेस मुक्त’ म्हणटा म्हणटा आतां गोंयची भाजप ‘काँग्रेस युक्त’ जाल्या आनी काँग्रेसीची भ्रश्टाचाराची परंपरा आनीक नेटान फुडें व्हरपाक लागल्या. गोंयच्या भाजपाक भ्रश्टाचारान विळखो घातला तो सोडवप प्रधानमंत्री नरेंद्र मोदी हांकां शक्य जातलें काय कितें, हो आतां म्हत्वाचो प्रस्न. भाजपाची शिस्त, तत्वां आनी भ्रश्टाचाररहित प्रशासन ह्यो गजाली फकत प्रचाराच्यो पोक्यो गजाली थारल्यात. प्रत्यक्षांत भ्रश्टाचाराच्या बाबतींत मात गोंयच्या भाजपान काँग्रेसीकूय बी आतां फाटी उडोवपाचो विक्रम केलां. प्रधानमंत्री नरेंद्र मोदी हांतूत लक्ष घालपाक शकतात काय कितें वा हें मान्य करूनूच आतां आमकां रामराज्याची सपनां पळोवचीं पडटलीं, हें येवपी काळूच थारायतलो.
किशोर नायक गांवकार
7774039242
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
