तुयां बिबट्याचो सुण्याचेर हल्लो, चांदेला कानालांत गव्या वांगडा पडलीं दोन वासरां
भांगरभूंय | प्रतिनिधी
पणजी ः रानवटी जनावरांचो लोकवस्तींनी तशेंच रस्त्यार भोंवपाचो आंकडो सध्या वाडत आसा. गांवगिऱ्या वाठारांनी रातचें तशेंच दिसांचे बिबटो, रानदुकर आनी गवें भोंवतना दिसतात आनी हाका लागून लोका मदीं भंय निर्माण जाला. अश्योच दोन घडणुको पेडणें तालुक्यांत घडल्यात. तुयां काल रातीं एका बिबट्यान घराचे गॅलरींत येवन पाळीव सुण्याचेर हल्लो केलो. जाल्यार हाळी- चांदेला तिलारी कानालांत गव्या वांगडा ताचीं दोन वासरां पडपाची घडणूक घडली.
चड म्हायती प्रमाण चिवय – तुयां प्रशांत तिळवे हांच्या घरांतल्या सुण्याक बिबट्यान मारलो. रातच्या वेळार घराचे गॅलरींत येवन बिबट्यान सुण्याचेर हल्लो केलो. सुण्यांक गॅलरींत बांदून दवरिल्लो. रातचे वेळार बिबटो गॅलरींत भितर सरलो आनी सुण्याचेर हल्लो केलो. ह्या हल्ल्यांत सुण्याक मरण आयलें. हे घडणुकेक लागून तुये वाठारांत भंय निर्माण जाला.
मजगतीं, आयज सकाळीं हाळी- चांदेला तिलारी कानालांत गव्या वांगडा ताचीं दोन वासरां पडिल्ल्यांचे दिसून आयलें. रान अधिकाऱ्यांक ही गजाल कळ्ळ्या उपरांत सकाळ सावन तांचो पंगड त्या सुवातेर पावलो आनी तांका भायर काडलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
