गौड सारस्वतांचो इतिहास

भांगरभूंय | प्रतिनिधी

देव आनी देवळांचे अस्तित्व वेदिक काळांतल्यान आसा. हें सांगपी ऋग्वेदांतले श्लोक आणि संदर्भ लेखकान खूप सखोल अभ्यास करून दिल्यात. ह्या पुस्तकांत महर्षी परशुराम हांचेर एक अध्याय आसा, तातूंत आमकां गोंयच्या आराध्य देव- देवतांचे विशीं गरजेचीं अशीं म्हायती मेळटा.

अयोध्येंत २२ जानेराक रामलल्ला आपल्या मूळ जाग्यार पावलो. हो खीण पळोवपी आमी खूब नशीबवान, अशें हांव मानतां.  कारण 1528 -29 ह्या दशकांत पुरातन अशें हें राममंदिर बाबराच्या सैन्यान उध्वस्त केल्लें. हिंदूंचें एक आराध्य दैवत म्हळ्यार राम. हय, तोच राम जांका आमी ‘मर्यादा पुरुषोत्तम’ आनी एक अभुतपूर्व राजा म्हूण मानतात. फाटलीं 500 वर्सां आमकां हिंदूंक न्याय मेळचो म्हूण जायत्या राम सेवकांनी आपलो जीव ओंपलो. त्या संघर्शाचें फळ आयज आमकां मेळ्ळें. मन भरून आयलें. आनी एक विचार तकलेंत आयलो…. आमी कोण?

हांव एक भारतीय हिंदू गौड सारस्वत ब्राह्मण आनी हे म्हज्ये अस्मितायेचो म्हाका खूब अभिमान आसा. गौड सारस्वत ब्राह्मण हे संस्कृतायेचेर एक ल्हानसो लेख बरोवपाचें धाडस करपाचें थारायलें. एक दीस असोच नागेशीच्या देवळांत गेल्ले कडेन म्हजी नजर ‘THE GAUD SARASWAT BRAHMINS”… Their Foot Prints ’ ह्या पुस्तकाचेर गेली. लेखक चंद्रनाथबाब सिनाय धुमे हांणी हें पुस्तकाचें लेखन केलां. पुस्तकाचें मुखचित्र पयळतना, भारताचो पुरातन नकासो आणि स्थलांतर करपी ब्राह्मण पळोवन एक इतिहासीक आभास जालें बगर रावना. ह्या पुस्तकाचें 800 रुपया मोल आसा. तरीय लेगीत लेखकान व्हड मनान पुस्तकांक मेळपी येणावळ पुस्तक विकपी देवस्थानाक दान म्हूण दिल्या. पुस्तक वाचले उपरांत लेखकाचो हेतू फक्त लोकांक समाजाच्या गिन्यानाची जाण दरून दिवप होच दिसता. लेखक धुमेबाब हें विद्युत अभियांत्रिकी केल्ले निवृत्त सरकारी अधिकारी, जे 35 वर्सां भलायकी आनी सुरक्षा विभागांत उच्च पदाचेर आशिल्ले.

ह्या पुस्तकाक कैवल्य मठाधीश स्वामी शिवानंद सरस्वती हांणी मान्यताय दिल्या. देखून ह्या पुस्तकाक एक दैवीक प्रमाण मेळ्ळा. हें पुस्तक इंग्लीश आनी मराठी भाशेंत आसा, तशेंच जाय त्या सुवातेर संस्कृत संदर्भ दिल्ले आसात. ह्या पुस्तकांत बरयिल्लें प्रमाणे सारस्वतांचो उल्लेख वेद आनी पुराणांत मेळटा. ताका लागून समाजाक एक पौराणिक इतिहास आसा हें वाचल्या उपरांत होलमता.. ह्या पुस्तकांत लेखकान सारस्वतांचो उगम सरस्वती न्हंयचे देगेर जाल्लो.  थंयच्यान सारस्वत देश आर्यव्रत आनी गोमंत भूमीत आगमन सगळें विस्तारान बरयलां. तशेंच तांणी जागे कळपाक नकाशे वापरल्यात जाका लागून आतांच्या काळांत ते जागे कळपाक एकदम सोपें जाता. ह्या लेखकांचे मदीं एक उत्कृष्ट संशोधक लिपलां. हें आमकां कळटा. तांणी एक  लेखक म्हण पुस्तकांत मांडावळ बेस बरी केल्या.

ह्या पुस्तकांत दिल्ले म्हायती प्रमाण, सरस्वतांची मूळ भास संस्कृत. तें आपल्या भुरग्यांक संस्कृत शिकयताले. तशेंच तांणी ब्राह्मणी हे सोंपी आनी सुटसुटीत संस्कृत भाशेचो सोद लायिल्लो. सारस्वत मूळ शेतकार, ताचें जमनी कडेन एक खोल नातें आसा अशें हें पुस्तक आमकां  सांगता. देव आनी देवळांचे अस्तित्व वेदिक काळांतल्यान आसा. हें सांगपी ऋग्वेदांतले श्लोक आणि संदर्भ लेखकान खूप सखोल अभ्यास करून दिल्यात. ह्या पुस्तकांत महर्षी परशुराम हांचेर एक अध्याय आसा, तातूंत आमकां गोंयच्या आराध्य देव- देवतांचे विशीं गरजेचीं अशीं म्हायती मेळटा.  मुळांत शेतकार आसले, तरीय सारस्वतांनी आपल्या खर बुद्धिमत्तेच्या बळार स्वामित्व सिद्ध केलां. तशेंच तांणी विज्ञान, अर्थ, राजकारण आनी समाज उदरगत येस जोडलां. 

ह्या पुस्तकांत जायते अशे संदर्भ आसात, जे आमकां सारस्वतांच्या आडनांवा वेल्यान तांचे मुख्य वेवसाय सांगतात. दर एक सारस्वत आडनांवांचें महत्व आमकां लेखकान विसकाटावन समजायलां. ह्या पुस्तकांत १७ धडे आसात, दरेक धडो साप्प वेगळ्या विशयांचेर आसा. सारस्वतांचे खाण, शिक्षण, भास, तांणी करपाचे धर्मीक विधी वा कर्तव्यां ह्या पुस्तकांत वाचूंक मेळटात.

पुर्तुगेज गोंयांत आयले. तो एक वेगळो काळ आशिल्लो. पुस्तकांत ह्या वेळार जाल्ले अत्याचार, धर्मींक परिवर्तनां आनी उद्वस्त केल्लीं देवळां हांचे विशीं सविस्तरपणांन सांगल्यात. तें वेळा वयलो सारस्वत ह्या अत्याचाराक बळी पडलो… आनी आयज तो कसो आसा हें लेखकान लोकां मुखार दवरलां. पुस्तकाची लक्ष वेधपी गजाल म्हळ्यार लेखकान स्पर्श केला तो आयचे घडयेचे सारस्वतांचे प्रश्न, जशें विभक्त कुटुंब पद्धत जी कुटुंब तोडपाचें एक साधन जालां तशेंच पुरयतांचो उणाव. मठा कडेन जावपाक लागिल्लें नव्या पिळगेचें पयसलेंपण. तर अशें हें ‘Gaud Saraswat Brahmins…. Their Foot Prints’ पुस्तक. हांव सगळ्या वाचप्यांक तें वाचपाचो आग्रो करता. जाणें करून सारस्वतांचो इतिहास सगळ्यां मुखार येतलो.

भूषण शिरवयकार

9921347730