भांगरभूंय | प्रतिनिधी
मंत्री सुदिन ढवळीकार हांचो दावो
वावर पळोवन जनतेन निर्णय घेवचो
बरो वावर केल्ले खातीर सरकारांत मंत्री
भांगरभूंय । प्रतिनिधी
पणजी : गोंयांत मगोन पयलीं 17 वर्सां राज्य केलां. उपरांत काँग्रेसीची राजवट आशिल्ली आनी आतां भाजपा खाला युतीचें सरकार आसा. कोणे बरो वावर केला ताचो विचार करून जनतेन योग्य तो निर्णय घेवपाक जाय. येत्या वेंचणुकेत मगो – भाजप युतीक किमान 25 जागे मेळटलें. युती जाल्यारूच इतले जागे मेळप शक्य आसा, अशें वीजमंत्री तशेंच मगोचे आमदार सुदिन ढवळीकार हांणी म्हणलां.
कोण कशें काम करता, ते पळोवन जनतेन विचार करून निर्णय घेवपाक जाय. हे भायर हांव कांयच उलोवं शकना. हांवें बरो वावर केला म्हूण आयज हांव मंत्री आसा. भाजप- मगो युतींत मगो कितले जागे मागतलो, हाचो निर्णय पक्षाची केंद्रीय समिती घेतली, अशें ढवळीकार हांणी सांगलें.
अस्तंत बंगालांत ममता बॅनर्जी हांच्या टीएमसीची 15 वर्सां राजवट आशिल्ली. सरकारा आड आशिल्ल्या अॅन्टी इन्कबंसीचो फटको टीएमसीक बसलो. फाटले वेंचणुकेंत मगोन टीएमसी कडेन युती केल्ली. मगोन टीएमसी कडेन केल्ले युतीचें कारण वेगळें आशिल्ले, अशें तांणी सांगलें.
आतां मेरेन 1 लाख स्मार्ट मिटर बसयले
केंद्राच्या आदेशाक लागून गोंयांत स्मार्ट मीटर बसोवप बंधनकारक आसा. आतां मेरेन एका लाखा वयर स्मार्ट मिटर बसोवन जाल्यात. दिल्ले मुजतींत स्मार्ट मिटर बसोवपाचो वावर पुराय जातलो. बऱ्या कामाक सदांच विरोध आसताच. हेच भशेन स्मार्ट मिटराकूय विरोध जाता. स्मार्ट मिटरा मदीं प्रीपेड आनी पोस्टपेड हे दोनूय बील भरपाचे पर्याय उपलब्ध आसतले, अशें वीजमंत्री सुदिन ढवळीकार हांणी सांगलें.
स्वबळार सत्तेर येवपाची तांक : दामू नायक
भांगरभूंय । प्रतिनिधी
पणजी : मगो पक्षा कडेन आमची युती आसा. मगो कडेन युती जाली जाल्यार जागे वाडटलें, हे निश्चीत आसा. युती जाली ना जाल्यार लेगीत स्वबळाचेर सत्तेंत येवपाची तांक भाजपा मदीं आसा, अशें प्रदेश भाजप अध्यक्ष दामू नायक हांणी सांगलें. येता ते विधानसभा वेंचणुकेंत युती विशीं योग्य वेळार निर्णय जातलो. चर्चा करून जागांचे वांटप जातलें. तरी पक्ष म्हूण सगळ्या मतदारसंघांत आमची तयारी सुरू आसा. स्वबळाचेर 30 मतदारसंघ जिखपाचे आमचें उद्दिश्ट आसा. युती जाली जाल्यार जाग्यांत भर पडटली. वीज मंत्री आनी मगो आमदार सुदिन ढवळीकार हांच्या मता कडेन कांय प्रमाणांत हांव सहमत आसा. मात युती जाली ना जाल्यार लेगीत भाजपाक सत्ता मेळटली, असो विस्वास प्रदेश भाजप अध्यक्ष दामू नायक हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
