भांगरभूंय | प्रतिनिधी
युरी आलेमांव, आमदार एल्टन डिकॉस्टा हांणी पंचायत कर्मचार्यांक विचारलो जाब
केपें, प्रतिनिधी : आदार कार्ड दुरुस्ती कॅम्प ही कार्यावळ करपा खातीर आयिल्ल्यांक आंबावली पंचायत हॉल दिवंक ना. ताका लागून विरोधी पक्ष फुडारी युरी आलेमांव, आमदार एल्टन डिकॉस्टा हांणी पंचायतींत वचून कर्मचार्यांक जाब विचारली. तेन्ना लोकांची गैरवेवस्था जावची न्हय म्हणून सरकारी मुळाव्या विद्यालयांत ही कार्यावळ स्थलांतरीत केली.
आमदार एल्टन डिकॉस्टा हांणी आंबावली पंचायत वाठारांतल्या लोकां खातीर आदार कार्ड दुरुस्ती कार्यावळ आयोजीत केल्ली. हे विशीं तांणी सरपंचा कडेन उलोवणें केल्लें. तेन्ना आदार कार्ड अधिकारी, लोकूय हाजीर आशिल्ले. मात, पंचायत हॉलाची चावी तांणी दिवंक ना. ताका लागून हे कार्यावळीक हाजीर आशिल्ले विरोधी पक्ष फुडारी युरी आलेमाव, आमदार एल्टन डिकास्टा हांणी पंचायतींत वचून कर्मचार्यांक जाप विचारली. तेन्ना तांणी सांगलें, हें हॉल पयलींच २९ ते ६ फेब्रुवारी मेरेन बूक केलां. हॉल बूक केल्ले विशीं कसलेच तरेची तयारी पुराय करूंक नाशिल्ली. आदार कार्ड कार्यावळ जावची न्हय म्हणून मुद्दम हॉल बूक करून दवरलां अशें एल्टन डिकास्टा हांणी सांगलें.
उपरांत, एल्टन डिकास्टा हांणी लोकांक त्रास जावचें न्हय म्हणून पंचायती लागसारा बंद आशिल्ले सरकारी शाळेंत आदार कार्ड कार्यावळ स्थलांतरीत करपाचें थारायलें. केपेंचे एडीआय हांचे कडेन संपर्क करून, तांचे कडल्यान शाळेची चावी हाडून ही कार्यावळ शाळेंत केली. आंबावले पंचायतीचो केपें आनी कुंकळ्ळी ह्या दोनूय मतदार संघांनी आसपाव. ताका लागून अशे तरेचें राजकारण खपोवन घेवचे ना. हे विशीं विधान सभेंत आवाज काडटले अशें आलेमांव हांणी सांगलें.
जंय बरें काम जाता थंय राजकारण हाडचें न्हय: एल्टन
ह्या वाठारांतले लोक जेन्ना आदार कार्ड दुरस्ती खातीर मडगांवां वा हेर सुवातेर वतात तेन्ना तांकां फकत अपोयंटमेन्ट घेवपा खातीर एक देड म्हयनो वता. लोकांक जावपी त्रास लक्षांत घेवन ह्या कॅम्पाचें आयोजन केल्लें. हे विशीं सरपंचा कडेन उलयल्ले. मात कांय जाणांक हे बरे उपक्रम केल्ले पळोवपाक जायना. ताका लागून ते मदीं राजकारण हाडटात आनी पंचायत हॉल पयलींच बूक करून दवरिल्ल्याचें सांगतात. जंय बरें काम जाता थंय राजकारण हाडचें न्हय अशें एल्टन डिकॉस्टा हांणी सांगलें.
आयज जो प्रस्न मुखार आयला तो प्रस्न विधानसभेंत मांडटले. जनते खातीर राबयल्लो बरो उपक्रम आडावपाचो हो यत्न. हे विशीं लोकांक जी आडखळ जाली ते खातीर वायट दिसता. हांगा हाजीर आशिल्ल्या पंच वांगड्यांनी सरपंचाक जाप विचारपाक जाय. लोकांचीं कामां करपाक आमदार फुडें येतात तेन्ना राजकारण करप चुकीचें, अशेंय तांणी फुडें म्हणलें. ७ कोटी रुपयांचो रस्त्याचो टेन्डर पास जाला. काम सुरू जातलें. वीज समस्या सोडोवपाक २० कोटी रुपया खर्च करून जमनी पोंदच्यान लायटीच्यो सरयो घालतले, अशी म्हायती युरी आलेमाव हांणी ह्या वेळार दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
