शहीद दिसा निमतान फाल्यां गोंयांत 2 मिनटांचें मौन
भांगरभूंय | प्रतिनिधी
पणजी ः देशाच्या स्वातंत्र्या खातीर आपलो जीव वगडावपी हजारांनी शहिदांच्या उगडासाक, तांच्या विशीं आशिल्लो आदर व्यक्त करपा खातीर दर वर्सा प्रमाण अंदूं लेगीत देशभरांत 30 जानेवारीक दोन मिनटां मौन पाळटले. केंद्र सरकाराच्या निर्देशा प्रमाण गोंयच्या गृह खात्याच्या सचीवानी हे संबंदी सुचोवणी जारी केल्या.
सुचोवण्यां प्रमाण, अंदूं फाल्या मंगळारा 30 जानेवारीक सकाळीं 11 वरांचेर दोन मिनटां मौन पाळून हो दीस ‘शहीद दीस’ म्हणून मनयतले. 10.59 ते 11.00 वरां मेरेन सायरन वाजतले. उपरांत सगल्या सरकारी, अर्द सरकारी कार्यालयांनी, आस्थापनांनी, शिक्षणीक संस्थांनी, विद्यापिठांनी, अधिकाऱ्यांनी, कर्मचाऱ्यांनी, शिक्षकांनी, बिगर शिक्षकांनी, विद्यार्थ्यांनी आनी नागरिकांनी दोन मिनटां मौन पाळचें. सकाळीं 11.02 वरांचेर सायरन वाजोवन मौन सोंपपाची निशाणी करतले. सगळ्यांनी ही सुचोवणी पाळची असो उलो गृह सचिवांनी मारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
