भांगरभूंय | प्रतिनिधी
मेळिल्लो पद्मश्री पुरस्कार हो गोंयकार शेतकारांचो भोवमान
पणजी: गोंयच्या शेतकारांक सैमीक शेतूच फायदेशीर थारतलें. ताका लागून सैमीक शेतांचो प्रचार आनी प्रसार गतीन जावप आनी तरणाट्यांनी सैमीक शेतांक प्राधान्य दिवप काळाची गरज आसा अशें मत पद्मश्री पुरस्कार जैतिवंत गोंयकार शेतकार संजय पाटील हांणी आयतारा ‘भांगरभूंय’ कडेन उलयतना उक्तायलें. आपल्याक मेळिल्लो पद्मश्री पुरस्कार हो गोंयच्या सगल्या शेतकारांचो भोवमान आशिल्ल्याचेंय तांणी म्हणलें.
कृशी मळा वेले कामगिरीची दखल घेवन सावयवेरेंचे शेतकार संजय पाटील हांकां केंद्र सरकारान हालींच पद्मश्री पुरस्कार जाहीर केला. ते निमतान तांचे कडेन संवाद सादलो तेन्ना, सैमीक शेतांतल्यान शेतकार कशे तरेन स्वयंपूर्ण जावं येता हें पाटील हांणी पटोवन दिलें.
सावयवेरें हो दोंगराळ वाठार. 1985 वर्साच्या सुमाराक ह्या वाठारांत एप्रील, मे म्हयन्यांत पियेवपा बगर हेर कामां आनी शेतां खातीर उदक मेळप कठीण जातालें. हे परिस्थितीचेर मात करपा खातीर आमी दोंगराळ भागांत सुमार देडशें फुटीचें भुंयार खणून उदकाचें स्रोत मेळयलें. दुसरे वटेन पावसाचें दोंगरांत मुरिल्लें उदक सांठोवपा खातीर विवीध मार्ग आपणायले. तातूंतल्यान उदकाचो सांठो करून ताचो वापर कुळागरां खातीर सुरू केलो. ताका लागून सावयवेरें वाठारांतल्या शेतांक भांगराचे दीस आयले अशें पाटील हांणी म्हणलें.
सेंद्रीय शेता बदला तुमी सैमीक शेताक प्राधान्य कित्याक दिलें असो प्रस्न विचारलो तेन्ना, रासायनीक घटक टाळून सेंद्रीय पदार्थांचो वापर करून सेंद्रीय शेत पिकयतात. पूण, हातूंतल्यान शेतकारांक कसलोच फायदो मेळना. हातूंत फायदो फक्त गिरायक आनी कंपनींक मेळटा. हाचें उरफाटें सैमीक शेताक भायल्यान कांयच हाडचें पडना. स्वताच्या फार्मांत जें उपलब्ध आसा तातूंतल्यानूच शेतां पिकयतात. ताका लागून शेतकारांक 60 ते 70 टक्के फायदो मेळटा. ताका लागून आपणे सैमीक शेतांक प्राधान्य दिलें आनी स्वयंपूर्ण जालों. सावयवेर्यां 10 एकराच्या कुळागरांत आयज आपणें सुपारी, माड, काजू, अणस, केळी हांचे सयत मिरी सारखीं कांय मसाल्यांचींय पिकां घेता अशेंय तांणी सांगलें.
गोंयांत 1996 सावन सैमीक शेतांचो प्रसार
केंद्र सरकारान कांय वर्सां सावन गोंया सयत देशभरांत सैमीक शेतांच्या प्रसाराक गती दिल्या. पूण गोंयांत आमी 1996 सावनूच सैमीक शेतांचो प्रचार आनी प्रसार करीत आसात. ताका लागून खूबशे शेतकार सैमीक शेतां कडेन वळ्ळ्यात अशें संजय पाटील हांणी सांगलें.
अभ्यासू वृत्ती आपणायात
कृशी मळार येवप सोदपी तरणाट्यांनी पयलीं अभ्यासू वृत्ती आपणावपाची गरज आसा अशें संजय पाटील हांणी सांगलें. कृशी मळाच्या विकासा खातीर गरजेच्यो सगल्यो साधन सुविधा गोंयांत उपलब्ध आसात. ताचो शेतकारांनी लाव घेवंक जाय. राज्य सरकार कृशी विकासा खातीर खूबशीं धोरणां राबयता. हीं धोरणां तळागाळांतल्या लोकां मेरेन पावोवप आनी शेतकारांनी ती आत्मसात करून कार्यरत रावप गरजेचें आसा अशेंय संजय पाटील हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
