भांगरभूंय | प्रतिनिधी
आमदार विजय सरदेसाय हांणी केलें सादर
पणजी: गोंयच्या खाजगी कंपनींतल्या नोकऱ्यां मदीं गोंयकारांक 80 टक्के राखीव मेळोवपा विशीं खाजगी विधेयक आमदार विजय सरदेसाय हांणी परतून एकदां विधानसभेंत सादर केलां. ताका लागून 2 फेब्रुवारी सावन सुरू जावपी अर्थसंकल्पीय अधिवेशनांत ह्या विशया वेल्यान परतून बोवाळ जावपाची शक्यताय आसा.
गोंयांत बेरोजगारीचो आंकडो वाडत चल्ला. चडश्यो कंपनीं, आस्थापनां थळाव्यांक पयस दवरून गोंया भायल्या कामगारांक नोकऱ्यांनी प्राधान्य दितात. ताचो फटको थळाव्या तरणाट्यांक बसत आशिल्ल्यान सरकारान खाजगी कंपनीं, आस्थापनांतल्या नोकऱ्यांनी थळाव्यांक 80 टक्के राखीव दिवचें अशी मागणी करपी विधेयक आमदार विजय सरदेसाय हांणी फाटल्या दोन अधिवेशनांत सादर केल्लें.
हरयाना सारक्या कांय राज्यांनी अशे तरेचो कायदो आसा. पूण तसो कायदो गोंयांत कित्याक जावंक शकना असो प्रस्न करून आमदार सरदेसाय हांचे सयत सगल्या विरोधी आमदारांनी फाटल्या अधिवेशनांत सरकाराक धारेर धरिल्लें. पूण राज्यांतल्यो खाजगी कंपनी, आस्थापनांनी चडांत चड थळाव्यांक रोजगार दिवचो हे खातीर सरकार पुराय यत्न करीत आसा आनी तसो कायदो करूंक येवचो ना अशें सांगून मुख्यमंत्र्यांनी हे विशीं चर्चा करप टाळिल्लें. उपरांत आतां परतून आमदार सरदेसाय हांणी हें विधेयक सादर केल्ल्यान ताचे वेल्यान परतून अर्थसंकल्पीय अधिवेशनांत सत्ताधारी आनी विरोधक एकामेका सामकार उबे रावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
