भांगरभूंय | प्रतिनिधी
म्हापशें: म्हापशेंचो राखणदार आनी गोंयकार तशेंच शेजारच्या राज्यांतल्या भक्तांचें श्रद्धास्थान आशिल्ल्या श्रीदेव बोडगेश्वराचो 31 वो वर्धापन दीस सुवाळो मंगळारा विवीध धर्मीक आनी श्रींच्या उत्सव मुर्तीचेर अभिषेक करून मनयलो. जाल्यार बुधवारा देवाचो 89 वो जात्रोत्सव मनयतले.
श्रींच्या मुर्ती प्रतिश्ठापनेच्या 31 व्या वर्धापन दिसा निमतान सकाळीं देवस्थानाचे सचीव अॅड. वामन पंडीत आनी घरकान्न वीरा पंडीत हांच्या येजमानपणा खाला देवाच्या अभिषेक मुर्तीचेर अभिषेक केलो. दनपारां महाप्रसाद जाले उपरांत सांजवेळा 4 वरांचेर 5 ते 9 आनी 10 ते 14 पिराये गटांतल्या भुरग्यां खातीर वेशभुशा सर्त जाली.
सांजवेळा 7 वरांचेर सवायशिणीं वतीन दिपोत्सव मनयलो. रातच्या 8.30 वरांचेर ओम सत्य साई मंडळ म्हापशें वतीन प्रार्थना आनी भजनाची कार्यावळ जाली. उपरांत फोगाची आतशबाजी जाली.
मजगतीं, वर्धापन दिसा निमतान केंद्रीय मंत्री तशेंच उत्तर गोंयचे खासदार श्रीपाद नायक हांचे सयत नगराध्यक्षा प्रिया मिशाळ, उपनगराध्यक्ष विराज फडके, सद्याचे आनी आदले नगरसेवक हांणी श्रींचें दर्शन घेतलें. ह्या वेळार देवस्थान समितीचे अध्यक्ष आनंद भाईडकार आनी सहकारी पदाधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
