भांगरभूंय | प्रतिनिधी
इंडक्शन, मोबायल सांपडले; गांजो, तंबाकूची तस्करी
म्हापशें: कोलवाळ बंदखणींत झडटे वेळार तीन वीज इंडक्शन आनी पांच मोबायल फोन जप्त. बिस्किटींतल्यान तंबाकू आनी गांज्याचे तस्करीचोय यत्न. सुरक्षा रक्षकाचेर फातर शेंवटुपा उपरांत कर्मचाऱ्यां कडल्यान नायजेरियन बायल कैद्याक मारपेट अश्यो तीन घडणुको मंगळारा एकाच दिसा घडल्यो.
बंदखणीच्या गोपां कडल्यान मेळिल्ले म्हायती प्रमाण 23 वेर सकाळीं बंदखण निरिक्षक शंकर गांवकार हांच्या फुडारपणा खाला पंगडान बंदखणींतल्या कन्वीक्ट ब्लॉक विभागांत धाड घाली आनी झडटी घेतली. ह्या पंगडांत जेलर, सहाय्यक जेलर, हेड गार्ड, जेलगार्ड आनी एप्रिन्टीस कर्मचाऱ्यांचो आस्पाव आशिल्लो.
झडटे वेळार ह्या विभागांत पांच मोबायल फोन आनी तीन वीज इंडक्शन आनी चार्जर सांपडले. हें साहित्य पंगडान जप्त केले. पूण विभागांतल्यान भायर पड मेरेन दोन इंडक्शन गायब जाल्ले. हाका लागून जप्त केल्ल्या साहित्यांत फक्त एकाच इंडक्शनाची नोंद केली. सांपडिल्ली दोन इंडक्शनां खंय गायब जालीं हे विशीं कर्मचाऱ्यां मदीं तर्कवितर्क सुरू आशिल्लो.
ही धाड सुरू आसतनाच बायलांच्या कैदी विभागांत एक नायचेरियन कैदी बोवाळ घालताली. झडटी सोंपले उपरांत वयलो पंगड महिला विभागा वटेन गेलो. तेन्ना हे नायजेरियन बायल कैदेन बायलां सुरक्षा रक्षकांचेर फातर शेंवटिले. हातूंत मनीस संसाधन म्हामंडळाच्या ह्या सुरक्षा रक्षकाचे तकलेक जखम जाली. तिचेर रोखडीच बंदखणींतल्या दवाखान्यांत उपचार केले.
उपरांत ह्या पंगडान बोवाळ घालपी ते बायल कैदेक धरली आनी तिका मारपेट केली. हाका लागून तिचे तकलेक जखम जाली. तिचेरूय दवाखान्यांत उपचार केले. हो प्रकार दनपारां 12 वरांच्या सुमाराक घडलो.
सांजवेळा 4 वरांच्या सुमाराक बंदखणींत तंबाकू आनी गांजो ह्या नशेली पदार्थांचो तस्करीचो प्रकार उक्तडार आयलो. सोमारा 22 वेर बंदखणींत धाडिल्ल्या समजेद खान ह्या कैद्याक मेळपा खातीर ताची घरकान्न आनी मेवणो आयिल्लो. बंदखण सुरक्षा रक्षकांनी तांची झडटी घेतली तेन्ना तांचे कडल्यान बिस्किटीच्या पुड्यांत लिपयिल्लो तंबाकू आनी गांजो सांपडलो. हो पदार्थ बंदखण प्रशासनान जप्त केला. ह्या प्रकरणाचो फुडलो तपास बंदखण प्रशासन करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
