भांगरभूंय | प्रतिनिधी
मिशन पॉलिटिकल रिझर्वेशनाची शिटकावणी
मडगांव, प्रतिनिधी : गोंयच्या अनुसूचीत जमातीं खातीर मिशन राजकी आरक्षणाचें आश्वासन विधानसभेंत दिलां. मात तें पुराय जावंक ना. फुडल्या सात दिसांनी हे विशीं निर्णय जावंक ना जाल्यार अधिवेशना वेळार विधानसभेचेर मोर्चा व्हरतले, अशी शिटकावणी मिशन पॉलिटिकल रिझर्वेशनाच्या पदाधिकार्यांनी दिल्या.
मडगांवां पत्रकार परिशद घेवन मिशन पॉलिटिकल रिझर्वेशन फॉर एसटी ऑफ गोंयां वतीन राजकीय आरक्षण अधिसुचवणी नासल्यार विधानसभेर मोर्चा व्हरपाची शिटकावणी दिली. ह्या वेळार चळवळीचे संयोजक ऍड जॉन फर्नांडीस, जोसेफ वाझ, गोविंद शिरोडकार, जॉयसी आनी हेर हाजीर आशिल्ले.
ऍड जॉन हांणी, राज्य सरकार आदिवासी समाजा कडेन आडनदर करता. २००३त एसटीचो दर्जो मेळ्ळो मात आजूनय राजकी आरक्षण मेळूंक ना. केंद्र सरकारा कडेन सर्वपक्षीय शिष्टमंडळ घेवन वचपा खातीर राज्य सरकाराक रस ना. हाचे पयलीं २१ जुलय २०२३ दिसाच्या पावसाळी विधानसभेच्या अधिवेशना मजगतीं आमदार गणेश गांवकार हांणी राजकी आरक्षणाचो मुद्दो मांडलो. राज्यांतले लोकसंख्येतली १०.२३ टक्के लोकसंख्या एसटी समाजाची आशिल्ल्यान राजकी आरक्षण समाजाक मेळचें. ह्या समाजाक आनीक घटमूट करपाक राजकीय नेतृत्व मेळपाची गरज आसा. असो थाराव पावसाळी अधिवेशनांत संमत जाला.ह्या थारावाक सत्ताधारी भाजप सरकाराचो सह विरोधकांनी एकमतान मंजूर केला. मुख्यमंत्री प्रमोद सावंत हांणी आदिवासी कल्याणमंत्री ह्या नात्यान सर्वपक्षीय शिष्टमंडळा सयत दिल्लीक वचून केंद्र सरकारान एसटी समाजाक राजकी आरक्षण मेळचें हे बरोच काळ आडकल्ले समस्येचें निराकरण करपाची मागणी करतले अशें आस्वासन दिल्लें. हो थाराव सगळ्यांनी मंजूर केल्ल्याक बरेंच म्हयने गेले तरी सरकारान दिल्लीं आस्वासनां पुराय करपाक कसलेच तरेचें पावल उबारिल्लें दिसूंक ना. ताका लागून पुराय एसटी भावां कडेन फटींगपणा जाल्ल्याची भावना निर्माण जाल्या. ताका लागून अधिवेशन काळांत ५ फेब्रुवारीक विधानसभेचेर शांतीकायेन मोर्चा काडटले. सरकारान आदिवासी समाजाक रस्त्यार येवपाक लावचें न्हय, अशी मागणी केली.
सरकार खंय चुकलें तें दाखोवन दिलें. विवीध फुडार्यांक निवेदनां सादर केलीं. विधानसभेंतलें आश्वासन पाळिना. अध्यक्षांकांनी हे विशीं विचारपाची गरज आसा. २०२४ चे लोकसभा वेंचणुके पयलीं राजकी आरक्षणा खातीर अधिसुचवणी काडची, डिलिमिटेशन समितीची नियुक्ती करची, अशी मागणी शिरोडकार हांणी केली.
आमचो खंयच्याच पक्षा कडेन संबंध ना. ह्या आंदोलनाक कोणेंय फाटबळ दिल्यार तें नक्की घेतले. आदिवासी समाजाच्या हेर संघटणांचेंय फाटबळ घेतले. आदिवासी समाजांतले मंत्री जरी आसले तरी ह्या मुद्द्यार उलोवपाक जाय न्हय, मात तें कांयच उलयना अशें फर्नांडीस हांणी म्हणलें. लोकसभा वेंचणुकां विशीं जो कितें निर्णय आसतलो तो वेंचणुको जाहीर जाल्या उपरांत घेतले. होय मुद्दो सोडून दिवंक ना, अशेंय फुडें जॉन फर्नांडीस हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
