भांगरभूंय | प्रतिनिधी
पणजी : खण, पर्यटन आनी नुस्तेंमारी हे गोंयचे अर्थव्यवस्थेचे मुखेल वेवसाय. ह्या वेवसायांत गोंयकारांचो आसपाव जावप गरजेचें. हांतल्या नुस्तेंमारी वेवसायांतले चडशे कामगार बिगर गोंयकार आसात. ह्या वेवसायांत गोंयच्या तरणाट्यांचो व्हड आसपाव जावचो हाचे खातीर सरकारान यत्न करपाक सुरवात केल्या. हे फाटभूंयेर मुख्यमंत्री डॉ. प्रमोद सावंत हांणी बीएस्सी (नुस्तेंमारी) अभ्यासक्रम सुरू करपाचो सरकाराचो विचार आशिल्ल्याचें सांगलां. नुस्तेंमारी बंदीच्या काळांत यांत्रीक व्हड्यां वरवीं नुस्तेंकार, व्हड्यांच्या धनयांचेर दंडात्मक कारवाय जातली.
गोंयकारांच्या जेवणांतलो मुखेल घटक म्हळ्यार शीत आनी नुस्तें. नुस्तें वेवसायांत कोट्यांनी रुपयांची उलाढाल जायत आसता. मात हो वेवसाय फाटल्या कांय वर्सां सावन बिगर गोंयकारांच्या हातांत गेल्ल्याचें चित्र निर्माण जालां. बोटी वयल्या कामगारां पसून ते नुस्तें मार्केटांतल्या घाऊक विक्रेत्यां मेरेन व्हडा प्रमाणांत बिगर गोंयकार दिसून येतात. तशेंच नुस्तें पाळपांतूय बिगर गोंयकार चड आसात. हातूंत गोंयच्या तरणाट्यांचो वांटो सामको उणो आसा. ताका लागून दुसर्या राज्यांतल्यान कामगार हाडचे पडटात. हो वेवसाय गोंयकारांच्याच हातांत उरप काळाची गरज आसा. देखून सरकारान आतां खर पावल उखलपाचो विचार सुरू केला. ह्या वेवसायाची म्हायती गोंयच्या तरणाट्यांक मेळची म्हणून अभ्यासक्रम सुरू करपाचो विचार सरकारान केला. तशें मुख्यमंत्री डॉ. सावंत हांणीय आयज अशेंच सुचयलां.
नुस्तेंमारी वेवसायांत गोंयकार तरणाट्यांचो आसपाव वाडचे खातीर बीएस्सी (नुस्तेंमारे) अभ्यासक्रम सुरू करपाचो सरकाराचो विचार आसा, अशें मुख्यमंत्र्यान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
