भांगरभूंय | प्रतिनिधी
कूड सोयऱ्यांच्या ताब्यांत; पुलिसांचो सगल्या वटांनी तपास सुरू
मडगांव: दीक्षा गंगवार हिका मरण स्वास कोंडिल्ल्यान जाल्ल्याचें मरणा उपरांतचे तपासणे उपरांत स्पश्ट जालें. कुडीची चिकित्सा जाले उपरांत कूड दीक्षाच्या सोयऱ्यांच्या ताब्यांत दिल्या. ह्या प्रकरणांत पुलिसांनी खुनाची नोंद केल्या. लग्नाक सात वर्सां जावचे पयलींच मरण आयिल्ल्यान ह्या प्रकरणाचो उपविभागीय दंडाधिकाऱ्यांनी तपास करचो अशी मागणी बायलांचो एकवोट हांणी केल्या.
काब दी राम दर्यादेगेर शुक्रारा दीक्षा गंगवार (27, रा. शारदानगर लखनौ) हिचो घरकार गौरव कटियार हाणें उदकांत बुडोवन खून केलो. गौरवाक कुंकळ्ळी पुलिसांनी अटक केल्या. सध्या तो पुलीस कोठयेंत आसा. गौरव हो कोलव्यां एका हॉटेलांत वेवस्थापक म्हूण काम करतालो. लग्न जायत सावन गौरवान दीक्षाक गोंयांत हाडूंक नाशिल्लें. एका म्हयन्या पयलीं गौरवान दीक्षाक गोंयांत हाडिल्ली.
ह्या वेळार दीक्षाक घरकार गौरवाचे लग्ना भायले संबंद आशिल्ल्याची सुलूस लागिल्ली. हें आनीक कोणाक कळचें न्हय हे भिरांतीन गौरवान दीक्षाचो खून केलो. पुलिसांनी दुबाविताच्या मोबायला सयत लागींच्या मनशां कडल्यान आनीक कितेंय म्हायती मेळोवपा खातीर तपास सुरू आसा. दीक्षाच्या खुना उपरांत कुंकळ्ळी पुलिसांनी दीक्षाच्या कुटुंबांक गोंयांत आपोवन चवकशी केली. पुलिसांन सोयऱ्यांचो जबाब नोंद केला. हातूंतल्यान गौरवाचे लग्ना भायले संबंद आशिल्ल्यान दीक्षाक नांदोवन घेवपाक तयार नाशिल्ले सयत हुंड्याची मागणी करीत आशिल्ल्याचो नवो मुद्दो मुखार आयला.
दक्षीण गोंय जिल्हो हॉस्पिटलांतले मड्या कुडींत दवरिल्ल्या कुडीची तपासणी सोमारा जाली. हाचो अहवाल मेळ्ळे उपरांत दीक्षाक मरण नाकांत आनी तोंडांत उदक गेल्ल्यान स्वास कोंडून जाल्ल्याचें स्पश्ट जालें. ह्या प्रकरणांत पुलीस निरिक्षक डायगो ग्रसीयस हांच्या मार्गदर्शना खाला पुलीस उपनिरिक्षक तेजसकुमार नायक फुडलो तपास करतात.
बायलांचो एकवोटाची खोलायेन चवकशेची मागणी
बायलांचो एकवाट संघटणेच्यो संयाेजक आवढा व्हिएगश हांणी कुंकळ्ळी पुलिसांक पत्र बरोवन ह्या प्रकरणांत खोलायेन चवकशी करपाची मागणी केली. दीक्षाच्या लग्नाक सात वर्सां पुराय जावचे पयलींच मरण आयिल्ल्यान तशेंच हुंडाबळीची शक्यताय आशिल्ल्यान उपविभागीय दंडाधिकारी हांचे वतीन ह्या प्रकरणाचो तपास जावचो अशी मागणी केल्या.
दीक्षाचें मरण हुंड्या खातीर?
दीक्षा गंगवार हिच्या मरणा फाटल्यान हुंड्याची मागणी हेंच कारण आशिल्ल्याचें सांगतात. दीक्षाच्या कुटुंबाच्या लागींच्या मनशां कडल्यान दीक्षा हिच्या लग्ना वेळार कुटुंबान 10 लाखांचो हुंडो दिल्लो. पूण मोटार घेवपा खातीर गौरव आनीक 12 लाख रुपयांची मागणी करतालो अशें सांगलें. ताका लागून नुवेंची समंथा हिचे उपरांत हें दुसरें प्रकरण आसा. ह्या प्रकरणांत अजुनूय पुलिसांनी कसलीच स्पश्ट म्हायती दिल्ली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
