भांगरभूंय | प्रतिनिधी
पणजी, प्रतिनिधी : अयोध्येंत उबारिल्ल्या राम मंदिरांत आयज लाखांनी लोकांचे हाजेरिंत रामलल्लाचे मुर्तीची प्रतिश्ठापना जाली. राम मंदिराचे सपन साकार जाल्ल्यान पुराय गोंयांत आयज हजारांनी लोकांनी आनंदोत्सव मनयलो. सगळ्या देवळांनी सगळ्या लोकांच्या सहभागान एकाच दिसा असो उत्सव हाचे पयलीं केन्नाच जावंक नाशिल्लो. मुख्यमंत्री, मंत्री, आमदार आनी सगळ्या पक्षांचे, संघटनांचे कार्यकर्ते ह्या उत्सवात वांटेकार जाल्ले. हाका लागून गोंयांत आयज श्रीरामाचे अयोध्येचेंच दर्शन जातालें.
सकाळी राज्यांतल्या सगळ्या देवळांनी रामाचे पूजन जाले. मुख्यमंत्री डॉ. प्रमोद सावंत हांणी सकाळीं सपत्नीक आपल्या गांवाची देवता चंद्रेश्वराचें दर्शन घेतलें. उपरांत तांणी भामय- पाळी, सुरला हांगच्या देवळांनी पुजा केली. भलायकी मंत्री विश्वजित राणे हांणी केरीच्या देवळांत पुजा केली. रामाचो जप, भजन, कीर्तन अशो कार्यावळी दिसभर सुरू आशिल्ल्यो. पर्वरी उच्च न्यायालयात सुद्दा रामाच्या पूजेची कार्यावळ जाली. पणजी हनुमान मंदीर, महालक्ष्मी मंदिर, महालसा (म्हार्दोळ), मंगेश, राधाकृश्ण (सांखळी), मारुती मंदिर (सुधा काॅलनी) ह्या देवळांनी कार्यावळी जाल्यो. रातीं सगले लोक घराघरांनी पण्ट्यो पेटोवन दिवाळी मनयतले. देवळांनी नाटकां, किर्तनां, धर्मीक कार्यावळी आयोजीत केल्यात.
येत्या 3 वर्सांत सत्तरींतले 15 हजार लोक अयोध्येंत वचून राम मंदिराचें दर्शन घेतले, अशें भलायकी मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
