भांगरभूंय | प्रतिनिधी
पणजी ः गोंय राज्यांत नव्या अर्थीक आनी वेवसायीक गुंतवणुकेक चालना दिवपाच्या उद्देशान उद्देगीक उदरगत म्हामंडळाच्या (गोवा- आयडीसी) वतीन राष्ट्रीय भागीदार म्हूण भारतीय उद्देग महासंघाच्या (सीआयआय) सहकार्यान 29 जानेवारी 2024 दिसा “इन्व्हेस्ट गोंय 2024 परिशद” घडोवन हाडल्या.
वाणिज्य मंत्री मावीन गुदिन्हो, गोंय-आयडीसीचे अध्यक्ष आलेक्स रेजिनाल्ड लॉरेन्स, गोंय-आयडीसीचे वेवस्थापकीय संचालक प्रविमल अभिषेक (आयएएस) आनी सीआयआय अस्तंत विभागाचे उपाध्यक्ष स्वाती साळगांवकार हांणी ह्या उपक्रमाची घोशणा केली.
राज्यांतल्या उदरगत आनी उद्देगीक संदींचो फायदो घेवपा खातीर उद्देगीक मळा वयल्या मुखेल भागधारकांक संवाद सादपाक, विचारमंथन करपाक आनी उत्तम पद्दतींचेर विचार करपाक एक मंच दिवपाचो हे शिखर परिशदेचो हेत आसा. ह्या शिखर सभेंत उद्देग तज्ञ, मुखेल सरकारी अधिकारी, विचारवंत, नामनेचे राजकीय व्यक्ती आनी हेर नामनेचे भागधारक हाजीर आसतले. तशेंच हे परिशदेंत राज्यांत वेवसाय करपाची सोय वाडोवपा खातीर गोंय-आयडीसीन घेतिल्ले वेगवेगळे उपक्रम सादर करतले आनी गोंयांत गुंतवणूक करपाक सोदपी उद्देगांक वेगवेगळी माची उपलब्ध करून दितले.
राज्याक वेगवेगळे फायदे मेळटले –
० गुंतवणूक आकर्शीत करप ः इन्व्हेस्ट गोंय 2024 परिशद ही गोंय राज्याची अर्थीक तांक आनी क्षमताय दाखोवपाचो आनी राष्ट्रीय आनी आंतरराष्ट्रीय गुंतवणूकदारांक आकर्शीत करपाची एक माची आसा. हाका लागून वेगवेगळ्या क्षेत्रांत गुंतवणूक वाडोवन अर्थीक उदरगतीक चालना मेळटली.
० मान्यताय : अशा उपक्रमांक लागून गोंयची राश्ट्रीय आनी संवसारीक पावड्यांर उपस्थिती वाडटा आनी वेवसाय आनी गुंतवणुकींचें मुखेल केंद्र म्हूण मान्यताय मेळटा. हाका लागून आंतरराष्ट्रीय पांवड्यार सकारात्मक प्रतिमा आनी प्रतिश्ठा तयार करपाक मजत जाता.
० अर्थीक विविधताय : संवसारीक पर्यटन केंद्र म्हूण गोंयान आपली वळख पयलींच स्थापन केल्या. इन्व्हेस्ट गोंय 2024 परिशदे सारके उपक्रमा वरवीं नवीकरणीय उर्जा, लॉजिस्टिक आनी वेअरहाऊसिंग, आयटी आनी आयटीईएस ह्या नव्या आनी विंगड विंगड उद्देगांत गुंतवणूक आकर्शीत करून राज्याचे अर्थवेवस्थेंत विविधताय हाडपाक मजत जातली.
० नोकरी निर्माण : वाडिल्ली गुंतवणूक वेगवेगळ्या मळार रोजगाराची संद निर्माण करता, जाका लागून थळाव्या लोकांक फायदो जाता.
० धोरण तयार करप : गुंतवणूकदार आनी वेवसायीक क्षेत्रांतल्या नामनेच्या प्रतिनिधीं कडेन संवाद सादप आनी तांचे अणभवातल्यान राज्याच्या उद्देगीक धोरण तयार करपा खातीर मोलादीक सुचोवण्यो, कल्पना मेळटात. हाका लागून राज्य सरकाराक वेवसायाक अनुकूल वातावरण तयार करपाक मजत जाता.
० वेवसाय सहकार-वाडोवपाच्यो संदी : ही परिशद थळाव्या वेवसायांक राष्ट्रीय आनी आंतरराष्ट्रीय कंपनीं कडेन संवाद सादपाक, भागीदारी, सहकार आनी वेपार संदी वाडोवपाक एक प्रभावी आनी सुलभ माची दितली.
एकंदरीत, इन्व्हेस्ट गोंय 2024 परिशद वेवसाय, गुंतवणूक आनी सांस्कृतीक देवाण – घेवाण करपाक सक्षम करपी वातावरण तयार करून राज्याच्या अर्थीक उदरगतींत, संवसारीक पांवड्यार आनी लोकांच्या समृध्दींत म्हत्वाचें योगदान दितली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
