भांगरभूंय | प्रतिनिधी
म्हापशें: पालयें उसकय हांगा एके बायलेच्या गळ्यांतलें मंगळसुत्र झोमून व्हेल्ल्या प्रकरणांत म्हापशें पुलिसांनी दुबावीत आरोपी गौरीश शेटगांवकार (19, रा. नार्वें दिवचल) हाका अटक केली. चोरयेक गेल्ल्या मंगळसुत्राचें मोल देड लाख रुपया आसा.
ही घडणूक फाटल्या मंगळारा 9 जानेवारी दिसा सांजवेळा 4 वरांच्या सुमाराक घडिल्ली. कागाळदार नयनी ज्ञानेश्वर झांट्ये ही शेजारच्या घरांत वताली. त्या वेळार दुबावीत आरोपी धव्या रंगाची अॅक्टिवा स्कुटरी वयल्यान आयलो आनी तिका आडावन एका मनशाचो नामो विचारूंक लारलो. तिणें गांवांत अशा नांवाचो मनीस रावना अशें सांगून मुखार वचपाचो यत्न केलो. तेन्ना दुबावितान तिच्या गळ्यांतलें 20 ग्राम वजनाचें मंगळसुत्र झोमून पळ काडलो.
हे घडणुके उपरांत तिणें पुलिशेंत कागाळ दिली. तशेंच गांवांतल्या सीसीटीव्ही फुटेजींत बंदिस्त जाल्ल्या अनवळख्या दुबाविताचो व्हिडिओ थळाव्या लोकांनी व्हायरल केल्लो.
शेनवारा 20 वेर दनपारां शिरगांवच्या तरणाट्यांनी दुबावीत गौरेश शेटगांवकार हाका गांवांत आपोवन घेतलो आनी उपरांत ताका धरलो आनी दिवचल पुलिसांचे सुवादीन केलो. दिवचल पुलिसांनी दुबाविताक भादंसंच्या 41 कलमा खाला अटक केली आनी आनी संबंदितांक अटक केल्ल्याचो व्हायरलेस राज्यांतल्या सगल्या पुलीस स्टेशनाक धाडलो.
ह्या हायरलेसा प्रमाण म्हापशें पुलिसांनी दुबाविताचो फोटो आनी व्हायरल जाल्लो व्हिडिओची पडटाळणी केली. तशेंच कागाळदार बायलेक आपोवन शहानिशा केली तेन्ना तिनेय दुबाविताची वळख पटयली.
आयतारा 21 वेर म्हापशें पुलिसांनी दुबाविताक दिवचल पुलिसां कडल्यान ताब्यांत घेतलो आनी भादंसंच्या 379 कलमा खाला गुन्यांव नोंद करून ताका रितसर अटक केली. फुडलो तपास पुलीस निरिक्षक सीताकांत नायक हांच्या मार्गदर्शना खाला हवालदार अभिजीत माणगांवकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
