भांगरभूंय | प्रतिनिधी
कोंकणींतल्यान गोंयची अस्मिताय सांबाळपाची गरज आसा. कोंकणी ना जाल्यार अस्मिताय उरची ना. पुरस्कार आनी इनामां मेळिल्ल्ल्यांनी, हेर लेखकांनी फुडारांत कोंकणींतल्यान बरयतना काळजांतल्यान बरोवचें. पुरस्कार मेळटलें म्हूण बरय नाकात. दुसऱ्यांक बरें लागतलें म्हूण बरय नाकात. तुमच्या काळजाक धादोसकाय मेळटली अशें लेखन करात. तातूंत आमची माती, संस्कृताय, गोंय, गोंयकारपण दिसुंदी, ओ हेराल्डाचे संपादक, एलिस्टर मिरांद हांणी सांगलें. दाल्गाद अकादेमीन अस्मिताय दीस घडोवन हाडलो, तातूंत ते उलयताले. ओपिनियन पोलाचे निमतान डॉ जॅक सिकेरा हांचो उगडास दीस मनयलो तशेंच साहित्यीक सर्तींचो इनामां भेटवण सुवाळो घडोवन हाडलो.
हो सुवाळो पणजेंतल्या दा. कों. अ. रेजिनाल्ड फेर्नांडीस सभाघरांत आयोजीत केल्लो. मिरांद हांचे वांगडा दा. कों. अ. अध्यक्ष सेल्सो फेर्नांडिस, उपाध्यक्ष विलियम्स फेर्नांडिस, पा. मायरन जेसन बार्रेटो, भांडारी आफोन्सो ब्रागांझ हाजीर आशिल्ले.
मिरांदान सांगले, गोंयकारांची संस्कृताय हीच आमची वळख. तिका कोंकणी विणें संस्कृताय म्हणूक जावचेंना. जावं तीं फेस्तां, जात्रा, परबो, मांडे, दुल्पद, लोकनाच, लोकगीतां आदीं. जें – जें गोयांत आसा ताका कोंकणी लागू जाता. फाटलीं 8 वर्सां जालीं हो अस्मितायेचो दीस आमी मनयतात. कित्याक काय? आमचें गोंयकारपण आनी अस्मिताय नानपयत जाता काय? खरें म्हणल्यार व्हय ! कांय वर्सांनी आमकां हो दीस ना दिसपाची भिरांत जाल्या. देखून आमकां हुस्को. आमी एकामेकांचे हात धरून वेंग मारून आमची अस्मिताय सांबाळूंक जाय.
पा. मायरन जेसन बार्रेटो उपकार मानले. सोनिया गोम्स हांणी सुत्रसंचालन केलें. सर्तींतल्या जैतिवंतांक इनामां भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
