भांगरभूंय | प्रतिनिधी
पणजी : सरकारी नोकरी दितां, अशें सांगून ५ लाख रुपयांची तोपी घालपाच्या प्रकरणांत आगशी पुलिसांनी बापूय- पुताचेर गुन्यांव नोंद केला. ह्या प्रकरणांत गौतम सुभाष अस्नोटकार (२४, बामणभाट – मेरशे) हाचे आड आनीक एक गुन्यांव दाखल केला. ह्या प्रकरणांत ताचो बापूय सुभाष अस्नोटकार हांचो आसपाव आशिल्ल्यान ताचेय आड गुन्यांव दाखल केला.
आगशी पुलिसांनी दिल्ले म्हायती प्रमाण, ह्या प्रकरणांत सुर्ला – सांखळेच्या गोविंद आमोणकार हांणी कागाळ दाखल केल्या. ते प्रमाण दुबावीत गौतम हाणें बांबोळेच्या जीएमसी वाठारांत ऑगस्ट २०२२ त सरकारी नोकरी दितां, अशें सांगलें. ताणें ताचे कडल्यान ५,०६,२३८ रुपया घेतले. उपरांत सरकारी नोकरी मेळोवन दिवंक ना आनी रक्कम दिवपाकूय न्हयकार दिलो. ताका लागून कागाळदार ताच्या घरा गेले तेन्ना दुबाविताचो बापूय सुभाष हाणें तांकां धमकी दिल्ल्याचें कागाळींत म्हणलां.
हे विशीं आगशी पुलीस निरीक्षक विक्रम नायक हांच्या मार्गदर्शनाखाला उपनिरीक्षक रमेश हरीजन हांणी गौतम हाचे वांगडा बापूय सुभाष अस्नोटकार हाचे आड गुन्यांव दाखल करून तपास सुरू केला. मजगतीं सुभाष अस्नोटकार हाणे पणजेच्या उत्तर गोंय जिल्हो आनी सत्र न्यायालयांत अटकपूर्व जामीन अर्ज दाखल केला. ताचेर २४ जानेवारीक सुनावणी जातली.
आनीक दोन कागाळी
मजगतीं, अशाच आनीक एका प्रकरणांत आगशी पुलिशेंत साल्वादोर द मुंदच्या र्वेफ टियोटोनियो डिसोझा हांणी कागाळ दाखल केल्या. ते प्रमाण दुबावीत गौतम हांणी कागाळदाराच्या चल्याक सरकारी नोकरी दिवपाचें सांगून ताचे कडल्यान डिसेंबर २०२२ ते मार्च २०२३ मजगतीं स लाख रुपया घेतले. ह्या प्रकरणांत आगशी पुलिसांनी गौतम हाचे आड गुन्यांव दाखल करून ताका अटक केल्ली. उपरांत ताका पणजे प्रथमवर्ग न्यायालयान तीन दीस बंदखण फर्मायल्ली. हाचे मजगतीं न्यायालयान ताका २० हजार रुपयांचे हमीचेर आनी १५ दीस पुलीस स्टेशनाचेर हाजेरी लावपाचे अटींचेर जामीन मंजूर केला.
मजगतीं, मेरशेच्या एका तरणाट्याक अशेच तरेन सरकारी नोकरी दिवपाचें सांगून कागाळदारा कडल्यान ५ लाख रुपया घेतिल्ल्याची कागाळ पर्वरे पुलीस स्टेशनांत दाखल केल्या. हे विशीं पर्वरे पुलिसांनी गौतम आनी सुभाष अस्नोटकार हांचे आड गुन्यांव दाखल केला. ह्या प्रकरणांत सुभाषान उत्तर गोंय जिल्हो आनी सत्र न्यायालयांत अटकपूर्व जामीन अर्ज दाखल केला. ताचेर २३ जानेवारीक सुनावणी जातली. ह्या प्रकरणाचो पुलीस निरीक्षक राहुल परब हांच्या मार्गदर्शनाखाला उपनिरीक्षक मंदार परब फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
