भांगरभूंय | प्रतिनिधी
पणजी, पिनाक कल्लोळी ः गोंयांत जम्पिंग स्पायडराची (कोळी) एक नवी जात मेळ्ळ्या. ताचे ‘अफ्राफ्लासिया गोवाएन्सिस’ अशें नांव दवरलां. गोंय विद्यापीठ प्राणीशास्त्र विभागाचे डॉ. नितीन सावंत, विभुती गांवस हांचे सयत केरळांतल्या क्राईस्ट महाविद्यालयाचे हृषीकेश त्रिपाठी आनी ए. व्ही. सुधीरकुमार ह्या चार जाणांनी ही जात सोदून काडल्या. ही जात पुराय भारतांत सवे खेपे आनी गोंयांत पयलेच खेपे मेळ्ळ्या.
हे संबंदींचें संशोधन 17 जानेवारीक आंतरराष्ट्रीय संशोधन नेमाळ्यांत तरबियात मोदारेस युनिव्हर्सिटी प्रेसांत उजवाडाक आयलां. हो कोळी चोडण जुंव्या वयल्या खारफुटीच्या झाडां मदीं सांपडलो. शास्त्रीय अभ्यासा उपरांत तो जम्पिंग स्पायडर आशिल्ल्याचे स्पश्ट जालें. हाचे उपरांत ताका ‘अफ्राफ्लासिया गोवाएन्सिस’ अशें नांव दिले. गोंय विद्यापिठांत पदव्युत्तर पदवी घेवपी विभुती गावस हिणें ह्या संशोधनांत म्हत्वाचो वांटो घेतिल्लो.
अफ्राफ्लासिया हो कोळींच्या जंपिंग स्पायडर (साल्सीसिडाय) कुळांतलो एक वांगडी. हांचे पयलीं तमिळनाडू, केरळ, गुजरात, राजस्थान ह्या राज्यांनी हे जातीचे कोळी सांपडिल्ले. संवसारभर 6 हजारां परस चड प्रकारचे जंपिंग स्पायडर मेळटात. आतां मेरेन भारतांत हाच्यो स जाती सांपडल्यात. ही कोळी जात आफ्रिका, ऑस्ट्रेलिया, आशिया, युरोप ह्या देशांनीय सांपडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
