गोंयांत 22 जानेवारीक भौशीक सुटी जाहीर
भांगरभूंय | प्रतिनिधी
पणजी ः अयोध्येंत श्री राम मूर्तीच्या प्राणप्रतिश्ठापन सुवाळ्याक लागून सोमारा 22 जानेवारीक गोंयांत भौशीक सुटी जाहीर केल्या. हांतूत सरकारी खात्यांक, शाळांक, सगल्या बँकांक आनी हेर आस्थापनांकय सुटी दिल्या. निगोशिएबल इन्स्ट्रुमेंट्स ऍक्ट (Negotiable Instruments Act) खाला हो नवीन आदेश जारी केला.
सामान्य प्रशासन खात्यान जारी केल्ल्या आदेशा प्रमाण, श्री राम मूर्ती प्राणप्रतिश्ठापन सुवाळो उत्तर प्रदेशांतल्या अयोध्येंत जातलो. हे फाटभुंयेर ‘निगोशिएबल इन्स्ट्रुमेंट्स ऍक्ट 1881’ च्या कलम 25 प्रमाण भौशीक सुटी जाहीर केल्या. हाचे आदीं 17 जानेवारीक फकत सरकारी कार्यालयां आनी शाळांक सुटी जाहीर केल्लीं. तातूंत दुरुस्ती करुन नवो आदेश आयज जारी केला.
मजगतीं, केंद्र सरकारान ह्या उत्सवा निमतान केंद्रीय कार्यालयांत काम करपी कर्मचाऱ्यांक अर्द दीस सुटी दिवपाची घोशणा केल्या. त्या दिसा सकाळीं 9.30 ते दनपारां 2.30 मेरेन सरकारी कार्यालयां बंद आसतलीं. हे संबंदी आदेश दोन दिसां आदीं केंद्रीय कार्मिक मंत्रालयान जारी केला.
हाचे आदीं छत्तीसगढ, हरियाणा, उत्तर प्रदेश, मध्य प्रदेश आनी काल महाराष्ट्र सरकारानय भौशीक सुटी जाहीर केल्या. ते उपरांत आयज गोंय सरकारानय भौशीक सुटी जाहीर केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
