धारगळें अपघातांत दोग जाण जखमी
भांगरभूंय | प्रतिनिधी
कोरगांव ः सुकेकुळण, धारगळे मोपा लिंक रस्त्याचें काम चालू आशिल्ले सुवातेर मोटार आनी मोटारसायकली मदीं टक्कर जावन मोटारसायकली वयले दोग गंभीर जखमी जाल्यात. म्हापशेंच्या आझिलो हॉस्पिटलांत तांचेर उपचार चालू आसात. रामचंद्र रमेश मल्हार (23) आनी अशोक बंकी (24) अशी जखमी जाल्ल्यांचीं नांवां आसात. दोगूय वेंगुर्ल्यां (महाराष्ट्र) रावपी. विशेश म्हळ्यार जून 2023 वर्सा ह्याच सुवातेर भिरांकूळ अपघातांत एका मनशाक मरण आयिल्लें.
मोपाच्या मनोहर आंतरराष्ट्रीय विमानतळार देंवपी पर्यटक निशिता अगरवाल (25, तमिळनाडू) हिणें रेंट ए कॅब वेवसायिका कडल्यान भाड्यान आय 20 मोटार घेतिल्ली. काल सांजवेळा 4.30 वरांचेर ती मोपा सावन धारगळे वटेन येताली. त्याच वेळार रामचंद्र आनी अशोक दोगूय यामाहाच्या स्कुटरीन धारगळ सावन मोपा वटेन वताले. सुकेकुळण हांगा सुरु आशिल्ल्या फ्लायओव्हर पुलाच्या कामाच्या सुवातेर ह्या दोनूय गाडयांक अदमास आयलो ना. हाका लागून दोनूय गाडयो एकमेकांक नेटान आपटल्यो. हांतूत रामचंद्र आनी अशोक दोगूय गंभीर जखमी जाले. दोगांकय 108 अॅम्ब्युलन्सीन म्हापशेंच्या आझिलो हॉस्पिटलांत दाखल केले. थंय तांचेर उपचार चलतात. मजगतीं, पेडणें पुलिसांनी पंचनामो करून फुडलो तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
