भांगरभूंय | प्रतिनिधी
मडगांव: अपघात हो कोणूय मुद्दाम जावन करिना. पूण नव्या हीट अॅण्ड रन कायद्याक लागून सर्वसामान्य ट्रक चालकांक माटो त्रास जातलो. ताका लागून हीट अॅण्ड रनच्या नव्या कायद्यांत बदल करप वा रद्द करपाची गरज आसा, अशें म्हणणें द रिफोर्मस हे संघटणेन उक्तायलां. हे विशीं दक्षीण गोंय जिल्होधिकाऱ्यांक निवेदन सादर केलें.
दक्षीण गोंय जिल्होधिकाऱ्यांक अवजड वाहन धनयां वतीन निवेदन सादर केलें. द रिफोर्मस हे संघटणेचे लॉरेन्स डिसिल्वा, सुभाष केरकार, मिलन वायंगणकार हांणी अतिरिक्त जिल्होधिकारी श्रीनेत कोठावळे हांची भेट घेवन निवेदन सादर केलें.
तांणी सांगलें की अपघात कोणूच मुद्दाम जावन करिना. अपघात जाले उपरांत लोक चालकाक मारपेट करतात. त्याच कारणा खातीर चालक घडणूक थळा वयल्यान पळ काडटात. ताका मारपेट केल्यार ताचेर कसलोच कायदो काडिल्लो ना. आपले सुरक्षे खातीर चालक घडणूक थळा वयल्यान पळ काडटात. उपरांत तो पुलिसां मुखार हजरूय जाता. तशेंच चालकाचो म्हयन्याचो पगार 10 ते 15 हजार रुपया मेरेन आसता. ताका अपघाता उपरांतची जी सात लाखांची रक्कम भरपाक सांगल्या ती तो खंयच्यान भरतलो. तशेंच जर ताका 10 वर्सां बंदखण जाली जाल्यार ताच्या कुटुंबाचो उदरनिर्वाह आनी हेर खर्च कशे चलतले हे प्रस्न कायम आसात.
सद्या केंद्र सरकारान हो कायदो स्थगीत दवरिल्लो आसलो तरी हो कायदो रद्द जावपाची गरज आसा. वा तातूंत मोटे बदल जावपाची गरज आसा. चालक म्हूण काम करपी हे सर्वसामान्य घरांतले मनीस आसतात. तांचेर हो अन्याय आसा. ह्या कायद्याचो परतून विचार जावचो अशी मागणी केली.
केंद्र सरकारा कडल्यान हो कायदो तयार केला. ताचेर निर्णय लेगीत केंद्र सरकारूच घेवंक शकता. ताका लागून हे विशींचें म्हणणें केंद्रा कडेन धाडून दितले अशें अतिरिक्त जिल्होधिकारी श्रीनेत कोठावळे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
