भांगरभूंय | प्रतिनिधी
म्हापशें, प्रतिनिधी : पर्वरेच्या मॉल- दी- गोवाच्या मुखार राष्ट्रीय महामार्गाच्या कुशीक उबारिल्ल्या श्रीराम प्राणप्रतिष्ठापनेची म्हायती दिवपी तखटो अनवळखी व्यक्तीन आयज सकाळीं पिंजून उडयलो. हो प्रकार थंय आशिल्ल्या सिसीटीव्हींत आयला. पर्वरी पुलीस ह्या व्यक्तीक सोदतात.
अयोध्येतील श्रीराम प्राण प्रतिष्ठापनेच्या निमतान २२ वेर देशविदेशांत व्हड सुवाळ्याचें आयोजन केलां. गोंयांतूय ह्या निमतान आकर्शीत सजावट केल्या. रस्त्यांचे कुशीक तखटे लायल्यात. ही तयारी सुरू आसतनाच एका अनवळखी व्यक्तीन पर्वरीत राष्ट्रीय महामार्गाच्या कुशीक लायिल्लो श्रीरामाचो तखटो पिंजिल्ल्याचें प्रकरण मुखार आयलां.
आयज सकाळीं एक व्यक्ती जीवोत्तम मठा कडल्यान ओ कोकॅरो सर्कलाचे दिकेन व्हड बॅग घेवन हे सीसीटीव्हींत दिसता. हीच व्यक्ती श्रीरामाचो तखटो हातान ओडटना दिसता. तखटो पिंजून ती व्यक्ती फुडें वतना सीसीटीव्हींत दिसता. फुडें वचून ह्या व्यक्तीन ओ कोकॅरो सर्कला कडलोय तखटो पिंजलो.
मजगतीं, ह्या व्यक्तीक बेगीन अटक करपाची मागणी जाता.
ही घटणूक जाल्या उपरांत साळगांवचे आमदार केदार नायक आनी रामभक्त पर्वरीत एकठांय जाल्ले. तांणी ह्या दुबावीताक बेगीन अटक करून ताचेर कारवाय करपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
