भांगरभूंय | प्रतिनिधी
मडगांव, प्रतिनिधी : फुडले विधानसभा वेंचणुकेंत लोकांनी साथ दिल्यार आम आदमी पक्ष भोवमतान जिखून येतलो. येवपी लोकसभा वेंचणुके खातीर राष्ट्रीय पांवड्यार इंडिया अलायन्स तयार केल्या. कॉंग्रेस आनी हेर पक्षांच्या अलायन्सांत आप पक्ष आसा. गोंयच्या जागां विशींय चर्चा चालूच आसा. जे कितें थारायतले ते प्रमाण इंडिया अलायन्साच्या उमेदवाराक जिंकोवचें, असो उलो आप फुडारी तशेंच दिल्लीचे मुख्यमंत्री अरविंद केजरीवाल हांणी मारलो.
आम आदमी पक्षाचे राष्ट्रीय संयोजक तशेंच दिल्लीचे मुख्यमंत्री अरविंद केजरीवाल, पंजाबचे मुख्यमंत्री भगवंत मान हांचे वांगडा आमदार व्हेंझी व्हिएगस, क्रुझ सिल्वा, गोंय अध्यक्ष अमित पालेकार, आपचे राष्ट्रीय संघटक संदीप पाठक आनी हेरांनी बाणावले मतदारसंघांतल्या उदरगतीच्या कामांची पळोवणी केली. उपरांत बसकेक उलयतना केजरीवाल हांणी, आम आदमी पक्ष कायम कामाची राजनिती करता. हाचे पयलीं जातीधर्माची, भ्रष्टाचार, मारपेट, धर्मीक थळांनी राजनिती करता. कामांची राजनिती कोणेंच करूंक ना. कारण कोणाकूच काम करपाचें नाशिल्लें. आपांतले खुबशे फुडारी आपलें करिअर सोडून कितेंय तरी करपा खातीर, लोकां खातीर वावुरपाक आयल्यात. उदरगतीच्या कामांक लागून पक्षनिर्मिती उपरांत तीन फावटीं आपसारकिल्ल्या नव्या पक्षाची सत्ता आयली. उपरांत पंजाबांत सत्ता आयली. दिल्ली, पंजाबांत फुकट लायट दिता. मोहल्ला क्लिनिकांत फुकट वैजकी सुविधा, वखदां दिल्यां आनी हाचो फायदो हजारांनी लोकांनी घेतला अशें केजरीवाल हांणी म्हणलें.
बाणावले दानशूर व्यक्तींच्या सहकार्यान चार मोहल्ला क्लिनीक सुरू आसात. जांची सत्ता आसा तांणी कांयच करूंक ना. हें सेवाभावनेंतल्यान केलां. ताका लागून गोंयांत आम आदमी पक्षाची सत्ता आयल्यार जायते बदल राज्यांत घडूं येतात. आदीं पंजाबांत पयशांचो उणाव आशिल्ल्याचें सरकार सांगतालें. आपचें सरकार केल्या उपरांत पयशांची जावपी चोरी पयलीं आडायली. सध्या सरकार फायद्यांत आशिल्ल्यान आदलें जें कितें दिवपाचें आशिल्लें तें दितात आनी लायटूय फुकट दिली. सरकार कडेन पयशांचो उणाव केन्नास नासता. जाल्यार सत्ताधार्यांचे विचार, नियत बरी नासता. बर्या विचारांच्या व्यक्तींक वेंचून काडात. रस्तो , वीज, उदक, हॉस्पिटल, शाळो सगळें मेळपाक शकतलें, अशेंय केजरीवाल हांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
