भांगरभूंय | प्रतिनिधी
पणजी, प्रतिनिधी : मेरशेच्या शिवाजी नायक हांच्या खून प्रकरणांत सत्र न्यायालयान ओस्बान लुकास फर्नांडीस (मेरशे) आनी रमेश बागवे (मूळ मालवण) ह्या दोगांयकूय जल्मभर बंदखणीची ख्यास्त फर्मायल्ली. हे ख्यास्ती आड दोगांय आरोपींनी मुंबय उच्च न्यायालयाच्या गोंय खंडपीठांत दाखल केल्लीं आव्हान याचिका उच्च न्यायालयान आयज भायर मारली.
मूळ कोल्हापूरचे आनी मेरशे रावपी शिवाजी नायक ह्या आपल्याच कर्मचार्याचो खून ओस्बान लुकास फर्नांडीस आनी रमेश बागवे ह्या दोगांयनी हेर दुबाविताचे मजतीन ९ मे २०१३ दिसा रातच्या ८ वरांचेर केल्ल्याचें म्हणिल्लें. मेरशेच्या फर्नांडीस हांचे जमनींतल्यान जेसीबीचे मजतीन फोंडकूल खणून ती कूड पुलिसांनी भायर काडिल्ली. ह्या प्रकरणांत पोरणें गोंयचे तेन्नाचे निरीक्षक देवेंद्र गाड हांणी फर्नांडीस आनी बागवे ह्या दोगांयकूय अटक केल्ली. निवृत्त पुलीस निरीक्षक देवेंद्र गाड हांणी आनी उपरांत कृष्णा सिनारी हांणी तपास करून पणजेच्या पयलो वर्ग न्यायालयांत आरोपपत्र दाखल केल्लें.
उपरांत न्यायालयान हें खून प्रकरण उत्तर गोंय जिल्हो सत्र न्यायालयांत वर्ग केल्लें. उपरांत उत्तर गोंय जिल्हो सत्र न्यायालयांन १२ फेब्रुवारी २०१५ दिसा हेर दुबावितांक सोडून दुबावी ओस्बान लुकास फर्नांडीस आनी रमेश बागवे हांकां नायक हांचो खून करप आनी पुरावे नश्ट केल्ले खातीर दोशी थारायल्ले. उपरांत ३१ ऑगस्ट २०२० दिसा दोगांयकूय आजीवन बंदखण फर्मायली. पुरावे नश्ट केल्ल्या प्रकरणांत तीन वर्सां सादे बंदखणीची ख्यास्त आनी ५० हजार रुपया दंड फर्मायिल्लो. ह्यो सगळ्यो ख्यास्ती एकाच वेळार भोगपाच्यो आसात, अशें आदेशांत म्हणलां. तशेंच दंडाची रक्कम जमा केल्यार ती रक्कम कुटुंबीयांक दिवपाचो निर्देशूय जारी केला. ह्या प्रकरणांत न्यायालयांत पयलीं सरकारी वकील प्रतिमा वेर्णेंकार हांणी, जाल्यार पुनम भरणे हांणी न्यायालयांत युक्तिवाद केल्लो. हे शिक्षेक दोनूय आरोप्यांनी मुंबय उच्च न्यायालयाच्या गोंय खंडपीठांत आव्हान दिल्लें. उच्च न्यायालयाचे न्या. महेश सोनक आनी न्या. वाल्मिकी मिनिझीस हांच्या दोन वांगड्यांच्या खंडपिठान शुक्रारा निवाडो दिवन याचिका भायर मारली.
मजगतीं, हो खून १३ मे २०१३ दिसा अनमोडा उक्ताडार आयलो. नायक हांचो खून केल्या उपरांत तांची घरकान्न आनी भुरगीं हे विशीं कोणाक सांगत ह्या भंयान आरोपीन तांकां मूळ गांवां गडहिंग्लज – कोल्हापूर हांगां पावयतां अशें सांगून १३ मे २०१३ दिसा गाडयेंत घालीं. अनमोड घांटार पावतांच आरोपीन नायक हांचे घरकान्नीचो भुरग्यांच्या दोळ्यां सामकार गळो आवळून खून केलो. तिची कूड रस्त्या कुशीकचें दरयेंत उडयली. कांय अंतर पार केल्या उपरांत आरोपीन तांच्या भुरग्यांकूय दरयेंत उडयलीं. मात हीं दोगांय भुरगीं वाटावलीं आनी हो खून उक्ताडार आयलो.
रातच्या दाट काळखांत हीं भुरगीं त्या देंगणांतल्यान रस्तो सोदीत मुखेल रस्त्यार पावलीं. तेन्ना त्याच रस्त्या वयल्यान लोंढ्यां हांगच्यान मडगांवां येवपी बॉनावॅन्चर डिसोझा हांणी १४ मे २०१३ दिसा सकाळीं त्या दोगांय भुरग्यांची मजत केली. कुळे पुलिसांक म्हायती दिवन कागाळूय दाखल केली. अशे तरेन शिवाजी नायक आनी ताचे घरकान्नीचें खून प्रकरण उक्ताडार आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
