भांगरभूंय | प्रतिनिधी
पणजी ः चार वर्सांच्या पुताचो खून केल्ल्याचो आरोप आशिल्ल्या एआय कंपनीची धनी सूचना सेठ हिका 31 जानेवारी मेरेन न्यायालयीन बंदखणीत दवरपाचो आदेश बालन्यायालयान आयज दिलो. 9 जानेवारीक बेंगळुरूक पळून वतना तिका अटक केल्ली. तेन्ना सावन ती बंदखणीत आसा. आयज तिची बंदखणीत रावपाची मुजत सोंपले उपरांत पुलिसांनी तिका बाल न्यायालयांत हाजीर केली.
मजगतीं, सूचना 10 जानेवारी सावन कळंगुट पुलिसांच्या बंदखणीत आशिल्ली. इतली चवकशी करुन लेगीत तिणें अजून खूनाची स्पश्ट कबूली दिवंक ना. ते भायर घडिल्ल्या घडणूकी विशीं तिका कांयच दुख्ख ना अशेंय चवकशींतल्यान पुलिसांक दिसून आयलां. देखून बांबोळीच्या मानसीक हॉस्पिटलांत सुचनाची चांचणी केली. तेन्ना तिची मानसीक स्थिती सामकी बरी आसा, तिका मानसीक दुयेंस ना हें चांचणेंतल्यान स्पश्ट जालें. तिचे विशीं चांचणी आनी समुपदेशन अहवाल अजून येवपाचो आसा. तो मेळ्ळ्या उपरांत आरोपपत्रांत त्या अहवालाचो उल्लेख करतले अशी म्हायती पुलिसांनी दिल्या. मजगतीं, सूचना सेठ आपूणच पुताचो खून केलां हें मान्य करिना. तरी लेगीत परिस्थिती आनी पुरावे तिचे विरोधात आसात. ह्या पुराव्याच्या आदाराचेर तिका ख्यास्त मेळूं येता असो दावो पुलिसांनी केला.
घोवाक हांव नाका पूण पूत जाय. जर बायल नाका, तर पुतय मेळचो ना ह्याच रागांतल्यान तिणें हो खून केलो आसूं येता आनी हेंच खून करपा फाटलें मुखेल कारण आसतलें अशें चवकशींतल्यान दिसून आयल्ल्याचे पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
