भांगरभूंय | प्रतिनिधी
म्हापशें: साकवाडी हडफड्यां मिठाघरच्या (आगर) संवेदनशील अशे सुवातेंत केल्ल्या कथीत बेकायदो बांदकामाची पळोवणी हडफडें-नागवा पंचायतीन केली.
सदर सर्वे क्रमांक 158/0 आनी 159/0 ह्या जमनींत सुरेंदर कुमार खोसला हाणें बेकायदो रितीन रॅस्टोरंण्ट, डिस्को स्टेज, दुकानां तशेंच संरक्षण आनी फोटकाचें बांदकाम केल्ल्याची कागाळ प्रदीप घाडी आमोणकार आनी सुनील दिवकार हांणी पंचायती कडेन केल्ली.
तशेंच हे कागाळीची प्रत तांणी मुख्यमंत्री, पर्यावरण आनी पर्यटन मंत्री, थळावे आमदार, राज्याचे मुखेल सचीव, उत्तर गोंय जिल्होधिकारी, पंचायत संचालक, मुख्य नगरनियोजक, उपजिल्होधिकारी, मामलेदार, प्रदुशण मडळ आनी दर्यादेग वाठार वेवस्थापन प्राधिकरण हांकां सादर केल्ल्यो.
ह्या कागाळीच्या आदारान बुधवारा 17 वेर सरपंच रोशन रेडकार सचीव रघुवीर बागकार हांणी पंचायत कर्मचाऱ्यां सयत सदर सुवातेची पळोवणी केली आनी कागाळींत बेकायदो म्हणिल्ल्या बांदकामाची मेजणी केली.
कागाळींत नमूद केल्ल्या प्रमाण, परंपरीक मीठघर सुवातेंत मातयेचो भराव घालून डिस्को स्टेजीचें केल्लें बांदकाम अस्थीर आसून ते खंयच्याय खिणाक पडून निश्पाप पर्यटकांच्या जिवार येवंक शकता. हे सुवातेंतलें घाण उदक खाडयेंच्या माध्यमांतल्यान दर्यांत सोडून दितात. वयली सुवात ही अविकसीत आशिल्ल्यान हे सुवातेर अतिक्रमण करून बांदिल्ल्या बांदकामा खातीर कसलोच परवानो घेतिल्लो ना असो दावो ह्या कागाळदारांनी केला.
हफडें नागवा पंचायतीन कागाळी प्रमाण साकवाडी हांगासरल्या त्या कथीत बेकायदो बांदकामाची पळोवणी केल्या. हे पळोवणेचो अहवाल सचिवां कडल्यान पंचायत मंडळाचे बसकेंत दवरतले. हे बसकेंत हाचेर चर्चा जातली आनी उपरांत संबंदीत बांदकामाक कारणां दाखय नोटीस दिवन संबंदीत बांदकामाची कागदपत्रां सादर करपाचे निर्देश दितले अशी म्हायती सरपंच रोशन रेडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
