भांगरभूंय | प्रतिनिधी
पणजी, प्रतिनिधी : नव्या वर्साचो अठरावो दीस. राज्यांत अपघातांत मरण येवपाच्यो घडणुको दर दिसा आयकुपाक मेळटात. शेनवारा आमोण्या एक अपघात जाल्लो आनी तातूंत एकटी बायल गंभीर जखमी जाल्ली. हे हीट अॅण्ड रन केसींत जखमी जाल्ली श्रद्धा श्रीराम शेटकार हिका आयज सकाळीं गोमेकोंत उपचारा वेळार मरण आयलें. तिचे कुडीचेर आयज कुंभारवाडी (दोडामार्ग) हांगा निमाणे संस्कार जाले. ती फोटो जर्नलीस्ट गणेश शेटकार हांची धाकटी भयण.
श्रद्धा ही आपल्या घोवा वांगडा मातयेचीं आयदणां विकपाचो वेवसाय करता. सदचे वरीं शेनवारा ती काम सोंपोवन सदच्या पायलटा वांगडा घरा परतताली. मात आमोण्या पुला लागसारा फाटल्यान येवपी एके चारचाकी वाहनान तांच्या मोटारसायकलीक नेटाचो धपको दिलो. ती रस्त्यार आदळ्ळी. तांकां तेच अवस्थेंत सांडून चारचाकी चालकान थंयच्यान पळ काडलो. श्रद्धा हिचे तकलेक मार लागिल्ल्यान तिका जीएमसींत दाखल केल्ली. आयज सकाळीं उपचारा मजगतीं तिका मरण आयलें. हे विशीं अजून पुलिशेंत कागाळ नोंद जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
