भाडें दुपेट वाडयल्ल्यान म्हापशेंचे वेपारी बेजार
भांगरभूंय | प्रतिनिधी
आस्वासना उपरांत मोर्चो घेतलो फाटीं
म्हापशें, प्रतिनिधी: म्हापशेंचे पालिकेने दुकानांचें भाडें वाडयल्ल्यान आनी घरपट्टी लागू केल्ल्यान तिडकल्ल्या २०० वेपार्यांनी आयज सकाळीं १० वरांचेर पालिका कार्यालयाचेर धडक मोर्चा काडलो. हाची दखल घेवन थळावे आमदार, उपसभापती जोशुआ डिसोझा हांणी ‘आयज सांजेवेळार पालिका मंडळा कडेन बसका घेवन हो प्रस्न सोडोवया’ अशें आस्वासन दिल्या उपरांत वेपारी दनपरां परत गेले.
फाटल्या २९ डिसेंबराक जाल्ले पालिका मंडळाचे बसकेंत भाडेपट्टी दरवाडीचो थाराव मंजूर केल्लो. पीडब्ल्यूडीच्या नव्या भाडेपट्टी दरा प्रमाण २९६ प्रती चौरस मिटर दरवाढीक पालिका मंडळान मान्यताय दिल्ली. आदीं हें दर १५२ रूपया चौरस मिटर आशिल्लें. ताका लागून पालिकेच्या दुकानांचें भाडें सुमार दुप्पट (९६ टक्के) वाडयलां. ह्या भाडेपट्टी दरवाढीक विरोध करून म्हापशें वेपारी संघटणां पयलीं ४ जानेवारीक म्हापशें पालिकेचेर पाविल्ली. तेन्ना नगराध्यक्षांक आठ दिसांची मुदत दिल्ली. ह्या आठ दिसांनी पालिकेन हाचेर कांयच भुमिका घेवंक ना. देखून आयज सकाळीं परत पालिके कडेन मोर्चा व्हेलो. ह्या वेळार सुमार २०० वेपार्यांनी दुकानां बंद दवरून मोर्चांत वांटो घेतिल्लो.
सकाळी १० वरांचेर वेपारी पालिकेंत आयले तेन्ना नगराध्यक्ष वा मुख्याधिकारी कोणूच पालिकेंत हाजीर नाशिल्ले. ताका लागून वेपार्यांनी थंयच बसून आंदोलन चालूच दवरलें. आमदार आनी नगराध्यक्ष पालिकेंत येवन आमकां मेळना, तशेंच आमकां मान दिना जाल्या फाल्यां पुराय म्हापशें शार बंद करतले, अशी शिटकावणीं तांणी ह्या वेळार दिली.
मजगतीं, वेपार्यांनी आंदोलना केल्ल्याचें समजतांच दोन वरांनी थळावे आमदार तशेंच उपसभापती जोशुआ डिसोझा पालिका कार्यालयांत आयले. आमदारान मोर्चा घेवन आयिल्ल्यां कडेन चर्चा केली. ह्या प्रस्नाचेर आयज सांजवेळार पालिका मंडळा कडेन बसका घेवन योग्य तरेन प्रस्न सोडयतले, अशें आस्वासन तांणी दिलें. हाचे उपरांत वेपारी थंयच्यान परतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
