नाटककार, दिग्दर्शक, अभिनेते विजयकुमार नायक अंतरले
भांगरभूंय | प्रतिनिधी
फोंडें, प्रतिनिधी: गोंयचे नाटककार, दिग्दर्शक, लेखक आनी अभिनेते विजयकुमार विश्वनाथ नायक (५९) हांकां आयज मरण आयलें. तांच्या अचकीत मरणान नाट्यमळाचेर दुख्ख पातळ्ळां. नोव्हेंबरा सावन तांची भलायकी सारकी नाशिल्ली. कांय दीस जीएमसींत उपचार घेवन तांकां घरा धाडिल्ले. बिरेस्तारा भलायकी इबाडिल्ल्यान तांकां फोंडेंच्या उपजिल्हो हॉस्पिटलांत व्हरताले. मात वाटेरूच तांणी निमणो स्वास घेतलो.
तांचे फाटल्यान घरकान्न आनी पूत वरद नायक आसा. आयज सांजेवेळार तांचे कुडीचेर निमाणे संस्कार जाले. निमाणें दर्शन घेवपा खातीर विंगड विंगड मळा वयले मानेस्त व्हड संख्येन हाजीर आशिल्ले.
विजयकुमार हांचो जल्म वारखंडे- फोंड्यां जाल्लो. तांचे बापूय स. विश्वनाथ नायक हेय नाटककार, दिग्दर्शक आनी कलाकार आशिल्ले. १९५० वर्सा तांणी ‘हंस संगीत नाट्य संस्था’ स्थापन करून नाट्यसेवा सुरू केली. घरांत नाटकाचें वातावरण आसलें. सदांच नाटकाच्यो तालमी तांच्या घरांत रंगताल्यो. भुरगेपणा सावनूच विजयकुमार हांच्या बालमनात नाटकाचे आकर्शण आपसूकच निर्माण जाल्लें. भुरगेपणारूच तांकां मा. दत्ताराम हांचें मार्गदर्शन मेळ्ळें.
विजयकुमार हांणी खुबशीं नाटकां बरयल्यांत. पालशेतची विहीर, रोम जळत होतं, एकलव्य, मन अथांग, अंधारताना, एप्रिल फुल, थँक्यू आजोबा, फँटसी एक प्रेयसी, आम्ही सातव्या मजल्यावर अशा २६ नाटकांसह एकांकिका, बालनाट्य, एकलनाट्य, मूकनाट्य, नभोनाट्य अश्यो ७८ नाट्यसंहितां तांणी बरयल्यात. तांचीं आठां परस चड नाट्यपुस्तकां प्रकाशीत जाल्यांत. सपनांचो त्रिकोण, मर्डर ऑफ ऍन आर्टिस्ट, बिझी, जेथ ऑफ मर्सी, सरु राणीची राजवस्त्रे, एक क्षण मागे वळून पाहता, मानसी, मनकविता, नैना, अमर अमृता अश्यो सुमार ३३ परस चड एकांकी तांणी बरयल्यात.
उजवाडाची येवजण, नेपथ्य, पार्श्वसंगीत, भेसवण, मेकअप, मंच वेवस्थापन आनी हंस संगीत नाट्य संस्थे वरवीं नाट्यप्रशिक्षण दिवपाचें काम विजयकुमार हांणी केलें. युवा नाट्यमार्गदर्शन कार्यशाळो आयोजीत केल्यो. नाट्यनिर्मिती प्रक्रियेचेर ‘नाटक… अभिनय… रंगतंत्र…’ हें पुस्तक बरोवन तें प्रकाशीत केलां.
नाट्यलेखक, दिग्दर्शक, अभिनय हातूंत विजयकुमार फिशाल आशिल्ले. म्हणून तांकां गोंयां भायल्यान नाट्यसंस्था दिग्दर्शना खातीर आमंत्रण धाडटाल्यो. बिकानेर थिएटर फेस्टिव्हल, पुण्यांतलो आयपार आंतरराष्ट्रीय थिएटर फेस्टिव्हल सारकिल्ल्या महोत्सवांनी तांणी काम केलां. विवीध नाट्य संस्थांनी सोयरे दिग्दर्शक म्हणून तांणी काम केलां. तांकां खुबशे पुरस्कारूय फावो जाल्यात.
रंगभूमीचें न भरुन येवपी लुकसाण
रंगकर्मी विजयकुमार नायक ह्या संवसाराक अंतरल्याचें आयकून खूप वायट दिसलें. तांणी कलाकारांच्यो पिळग्यो घडयल्यो. खास करुन बाल आनी युवा पिळगेक नाट्य मळार मार्गदर्शन करपाचो वावर फाटलीं साबार दसकां तांणी केलां.
तांणी तयार केल्ले कलाकार आयज गोंय आनी राष्ट्रीय पांवड्यार नाट्य आनी टिव्ही मळारूय आपलें अस्तित्व निर्माण करूंक पावल्यात.
सुमार 35 वर्सां फाटीं तांणी ‘धमाल गोवा’ कार्यक्रमांतल्यान सामाजीक आनी राजकीय मळार वैचारिक जागृताय निर्माण केल्ली. रंगभूमीकडेन संबंधीत सगळ्यांखातीर ते ‘विजू’ म्हण परिचीत आशिल्ले.
आमच्या महाविद्यालया वांगडाच हेर शिक्षणीक संस्थां खातीर तांणी विजीटींग फेकल्टी म्हूण योगदान दिलां. निरंतरपणान योगदान दिवपी प्रयोगशील नाट्यकर्मी आमचे मदल्यान गेल्ल्यान रंगभूमीचें न भरुन येवपी लुकसाण जालां.
प्राचार्य डॉ. राजय पवार
कला अकादमीचे नाट्य महाविद्यालय, फोंडा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
