भांगरभूंय | प्रतिनिधी
वास्को, प्रतिनिधी: शिवानी राजावत (२६) आनी तिची आई जयदेवी चौहान (५०) हांच्या मरणा प्रकरणांत अनुराग सिंह राजावत हाणें जामिना खातीर केल्लो अर्ज दक्षीण गोंय जिल्हो न्यायालयान भायर मारला.
हुंड्या खातीर अनुराग हाणें नियोजन करून आपली घरकान्न शिवानी आनी सासूमाय जयदेवी हांचो खून केल्ल्याचो आरोप आसा. ह्या प्रकरणांत अनुरागाचे आवयक आरोपी केल्या.
१८ नोव्हेंबराक सकाळीं गॅस सिलिंडराचो स्फोट जावन शिवानी आनी तिची आई जयदेवी ह्या दोगांयकूय मरण आयिल्लें. पयलीं हें प्रकरण गॅस गळटेचें दिसतालें. मात चवकशे वेळार ताका मोडण मेळ्ळें. लग्नाक सात वर्सां जावचे पयलींच शिवानीक मरण आयिल्ल्यान कायद्या प्रमाण ह्या मरणाची चवकशी मुरगांवचे विभागीय न्यायदंडाधिकारी भगवंत करमली हांणी करून आपलो ९० पानांचो अहवाल वास्को पुलिसांक २१ डिसेंबराक सादर केल्लो. उपरांत शिवानीच्या मरणा प्रकरणांत वास्को पुलिसांनी अनुरागा आड २३ डिसेंबराक हुंडाबळी खाला गुन्यांव नोंद केल्लो. पयलीं असैमीक मरण म्हणून हें प्रकरण दाखल केलें. पूण शिवानीच्या घरच्यांनी नेट धरिल्ल्या भलतीच गजाल उक्ताडार आयली आनी अनुरागा आड खुनाचो गुन्यांव नोंद जावन ताका अटक जाली. हुंड्या खातीर तिचो घोव, सासूमाय छळ करताली, अशें शिवानीच्या भावान कागाळींत म्हणिल्लें. उपरांत न्यादंडाधिकारी करमली हांणी चवकशी सुरू केली. तांणी विवीध साक्षीदारांच्यो जबानी नोंद केल्यो. त्या साक्षीदारांनी ह्या गॅस गळती फाटल्यान अनुराग आसपाक शकता असो दुबाव उक्तायल्लो. मुद्दम एलपीजी गॅस सिलिंडराचो नॉब चालूच दवरिल्लो. मागीर तो सकाळीं कितें तरी विकतें घेवपाक घरा भायर सरलो. गॅस गळटी जावन कुडींत गॅस एकठांय जालो आनी स्फोट जावन तातूंत शिवानी आनी ताचे आवयक जळून मरण आयलें, अशे चवकशेंत मुखार आयलां. ह्या प्रकरणांत वास्कोचे उपअधीक्षक सलिम शेख हांच्या मार्गदर्शना खाला निरीक्षक कपिल नायक तपास करतात.
अनुरागान चवकशेंत सहकार्य करूंक नाशिल्ल्यान ताका अटक केली. अटके उपरांत ताणें जामिना खातीर अर्ज दाखल केल्लो. मजगतीं अनुरागाचो मेवणो शुभम चौहान हांणी ह्या प्रकरणांत हस्तक्षेप याचिका सादर केली. अनुरागाच्या जामीन अर्जाचेर युक्तिवाद जाले उपरांत न्यायालयान तो भायर मारलो.
शुभम चौहानाचे वकील अमेय प्रभुदेसाय हांणी, अनुराग हांणी पुराय प्लान करून बायल आनी सासूमायंक मारून उडयली. घरांतलो एलपीजी गॅस सिलींडर उक्तो करून दवरलो. सासू जयदेवी ही देवा कडेन दिवो लावपाक वता हें खबर आशिल्ल्यान ताणें तो वेळ थारायलो. तिणें दिवो लावपाचो यत्न करताच कुडींत स्फोट जालो अशें सांगलें. न्यायालयान सगळ्यो बाजू आयकून अनुरागाचो जामीन अर्ज भायर मारिल्ल्याची म्हायती अॅड. प्रभुदेसाय हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
