भांगरभूंय | प्रतिनिधी
म्हापशें, प्रतिनिधी : कळंगूटच्या एका हॉटेलांत पांच दीस रावन, खावन- पिवन मजा मारून देशी पर्यटक ९ लाख २१ हजार ४४५ रुपयांचो चुनो लाव पळ्ळे. उत्तर प्रदेशचे तरुण अगरवाल, एकेजी ट्रॅव्हल्स एजन्सीचे प्रतिनिधी ए. के. गुप्ता, रायपूरचे मनीश कासना आनी म्हैसूरांतले (कर्नाटक) रवितेज ऊर्फ प्रशांत कुमार हांचे आड कळंगूटेच्या नीलम हॉटेलाच्या वेवस्थापकान फटोवपाची कागाळ दाखल केल्या. वेवस्थापक जेकब जॉन हांणी ही कागाळ दिल्या उपरांत पुलिसांनी ह्या चवगां आड कागाळ नोंद केल्या.
८ ते १२ डिसेंबर ह्या काळांत १२० जाणां खातीर हॉटेलाच्यो ४५ कुडी बूक केल्ल्यो. थारिल्ल्या प्रमाण, १२० जाण हॉटेलांत येवन रावले. मजा करून ते परतले. ह्या काळांत तांणी हॉटेलान दिल्ले सेवेचे मेळून वट्ट १६ लाख ९ हजार ४४५ रुपया बील जालें. हांतले फकत ६ लाख ८८ हजार रुपया बील तांणी फारीक केलें. मात, ९ लाख २१ हजार ४४५ रुपया दिवंकूच ना. तांणी हॉटेलाक फटयलें. अशें हे कागाळींत नमुद केलां. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
