फुडल्या शिक्षणीक वर्साचें वेळापत्रक जारी
भांगरभूंय | प्रतिनिधी
पणजी : येता त्या २०२४-२५ ह्या शिक्षणीक वर्साचें वेळापत्रक शिक्षण संचालनालयान जारी केलां. गोंयच्या मुळाव्या, माध्यमीक आनी उच्च माध्यमीक शाळां खातीर तें आसा. ह्या वेळापत्रकांत शाळांनी सत्र परीक्षा केन्ना घेवच्यो आनी सुटयांचो काळ कितलो आसतलो हाची म्हायती दिल्या. परिपत्रक सगळ्या शाळांक धाडलां.
पयलें सत्र ४ जून ते २६ ऑक्टोबर २०२४ आनी दुसरें १८ नोव्हेंबर ते ३० एप्रील २०२५ ह्या काळांत आसतलें. शालेय कामाचे दीस २२० परस उणे नासचे आनी वट्ट शिक्षणीक दिसांचो आंकडो २०० दिसां परस उणो आसचो न्हयस अशें स्पश्ट केलां.
ह्या परिपत्रकांत व्हडल्यो सुटयोय नमूद केल्यात. हातूंत चवथीची सुटी ६ ते १२ सप्टेंबर, दिवाळेची सुटी २८ ऑक्टोबर ते १६ नोव्हेंबर आनी नातलांची सुटी २४ डिसेंबर २०२४ ते २ जानेवारी २०२५ ह्या काळांतल्या आसतली. गिमाळी सुटी १ मे ते ३ जून २०२५ मेरेन आसतली. भौशीक सुटयो सदां भशेन आसतल्यो. शाळा मुखेल्यांक हाचे भायर आनीक १० सुटयो घोशीत करपाचो अधिकार आसा. पालक- शिक्षक संघा कडेन चर्चा करून त्यो घोशीत करच्यो, अशें परिपत्रकांत सांगलां. सरकारान जाहीर केल्ल्यो भौशीक सुटयोय शाळांक लागू जातल्यो, अशेंय सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
