भांगरभूंय | प्रतिनिधी
भांगरभूंय। प्रतिनिधी
मडगांवः जनमत कौला वेळार 54 टक्के गोंयकारांनी दोन पाना वटेन मतदान केल्ल्यान गोंयची स्वतंत्र वळख तिगून रावली. गोंयकारांची अस्मिताय गोंयकारांनी आपलेंच खुस्तार मेळयली. सरकाराक अस्मिताय दिसाची याद ना. व्हो दीस सरकारी पांवड्यार मनोवचो हे खातीर विधानसभें आपूण खाजगी थाराव मांडटलों, अशें गोवा फॉरवर्डाचो अध्यक्ष विजय सरदेसाय हांणी सांगले. एक पावल एकचाराचें आनी कोंकणी भाशा मंडळान जनमत कौल दिसा निमतान आयोजीत केल्ले अस्मिताय दीस कार्यावळीत ते उलयताले.
सध्या सत्तेर आशिल्ल्या सरकाराक अस्मिताय दिसाची याद उरूं ना. हाचे वयल्यान हें सरकार गोयचें महाराष्ट्रांत विलिनीकरण जावचें ह्या मताचें आसा काय कितें, असो प्रस्न पडटा. आदलो मुख्यमंत्री सर्गेस्त मनोहर पर्रीकार हाणी व्हो दीस राज्य पांवड्यार मनयतले अशें जाहीर केल्लें. पूण ते उपरांत कांय जालें ना. येता त्या विधानसभा अधिवेशनात आपूण खाजगी थाराव मांडटलों तेन्ना ह्या सरकाराचो खरो रंग दिसतलों अशें सरदेसायान सांगलें.
गोंय स्वतंत्र रावल्ल्यान जायत्यो गजाली जावपाक शकल्यो. गोंयांक घटक राज्य दर्जो मेळ्ळो. कोंकणीक राज मान्यताय मेळ्ळी. कोंकणीचो संविधानाच्या 14व्या परिशिश्टांत आसपाव जालो. गोंयांत लागू आशिल्लो समान नागरी कायदो पुराय देशांत लागू करपाचो विचार केंद्र सरकारान चलयला. गोंयांतलो समान नागरी कायदो ही लेगीत गोंयची वेगळी वळख आसा. गोयचें सरकार गोंयकारवादी, कोंकणीवादी आसपाक जाय. ही दोन तत्वां स्विकारना जाल्यार हें सरकार गोंयच्या हिताचे ना अशें आपल्याक दिसता असें ताणी सांगलें.
कोंकणी भाशा मंडळ आनी एक पावल एकचार तशेंच रवींद्र केळेकार ज्ञानमंदीर हांच्या जोड पालवान मंडगांवच्या रवींद्र भवनांत अस्मिताय दीस जैताचो सुवाळो आयोजीत केल्लो. सुरवेक कोंकणी भाशा मडळाची अध्यक्ष अन्वेषा सिंगबाळान सगल्यांक येवकार दिलो. व्हो दीस सरकारी पांवड्यार मनोवचो अशें ताणे सांगलें. जनमत कौलाक लागून गोंयचें अस्तित्व तशेंच गोंयची संस्कृती तिगली अशें प्रशांत नायक हाणे सांगलें. सुवाळ्यांत रवींद्र केळेकार ज्ञानमंदिरा वांगडा कुडचडें हांगचें न्यू एज्युकेशन सोसायटी हायस्कूल, माशें निराकार विद्यालय, कुडचडें सर्वोदय हायस्कूलाच्या विद्यार्थ्यांनी वांटो घेतलो आनी तांणी प्रभातफेरी काडली. सांस्कृतीक कार्यावळी आनी पथनाटकां सादर केली. ह्या दिसा निमतान विद्यार्थ्यां खातीर प्रस्नमंजुशा सर्तीचें आयोजन केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
