भांगरभूंय | प्रतिनिधी
पणजी, प्रतिनिधी: मुखेल सचीव पुनीत कुमार गोयल हांच्या अध्यक्षपणा खाला स्मार्ट सिटीच्या कामां विशीं बसका आयज जाली. हे बसकेक मंत्री बाबूश मोन्सेरात हाजीर आशिल्ले. तांणी सांगलें, स्मार्ट सिटीचीं कामां हलक्या दर्जाचीं जाल्यार सल्लागारांक जापसालदार धरतले. हे बसकेक महापालिका, ट्रॅफिक पुलीस, भौशीक बांदकाम खातें तशेंच हेर खात्यांतले अधिकारी हाजीर आशिल्ले.
स्मार्ट सिटीच्या कामां विशीं सल्लो दिवपा खातीर सल्लागारांक बरीच व्हड रक्कम दिल्या. ताका लागून तांचीं कामां बर्या दर्जाची आसतलीं हाची खात्री करून घेवप गरजेचें. कंत्राटदारांची बिलां मंजूर करचे पयलीं सल्लागारांनी कामांची तपासणी करची. ३१ मे च्या मुदतींत कामां पुराय जातलीं हे विशीं फाटपुरवण करप म्हजें काम अशें मंत्री मोन्सेरात हांणी सांगलें.
आयची बसका ह्या कामांच्या नियोजना खातीर आशिल्ली. मुखेल सचिवांनी सगळ्या कंत्राटदारांक तांचीं कामां दिल्ले मुजतींत पुराय करपाच्यो सुचवण्यो दिल्यात. एका कामाची मुजत चुकल्यार ताचो परिणाम फुडल्या कामाचेर जाता. ताका लागून कंत्राटदारांनी कामां वेळार पुराय करचीं. फाटल्या वर्सा पावसांत कितें जालें हे विशीं आयज उलोवया नाका अशें तांणी फुडें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
