भांगरभूंय | प्रतिनिधी
पणजी, प्रतिनिधी : पेडणें म्हालांक मेळिल्ल्या आमदार, मंत्र्यांनी सारकें काम करूंक ना. आतां ताचे परिणाम पेडणेकारांक भोगचे पडटात आनी लोक ताचो दोश आतांच्या आमदारांक दिता, अशें मांद्रेचे आमदार जीत आरोलकार ‘प्रुडंट मिडिया’च्या ‘हॅड ऑन’ कार्यावळींत सांगलें.
मोपा एॅरपोर्ट, आयूश हॉस्पिटल आनी हेर प्रकल्पांचेर थळाव्यांक नोकर्यो मेळपाक पयलींच एग्रीमेंट जावपाक जाय आसले ते जावंक नात. ताका लागून थळाव्यांक आतां वेगळें आरक्षण मेळना, अशें आमदारान फुडें म्हणलें. ह्यान फुडें आपल्या कार्यकाळांत कसले प्रकल्प आयल्यार थळाव्यांक ताचो लाव मेळपाकूच जाय, अशें पयलीं एग्रीमेंट जातलें अशें तांणी स्पश्ट केलें. गोंयांत कसलेय प्रकल्प येतात वा कितेंय जाता ताचो पयलो प्रयोग पेडणेंकारांचेर करतात.
फुडली वेंचणुक लोकांक जाय त्या पक्षाच्या तिकेटीचेर लडटलों. मगो पक्षान आपल्याक खूश करपाक कांय करूंक ना. तशेंच वेंचणुकेक अर्थीक मजत केल्या अशेंय ना. पक्षान आपल्याक दुखोवपा सारकें कितें केलां जाल्यार तेंवूय आपल्याक खबर ना अशें जीत हांणी सांगलें.
वेंचणूक येता तेन्ना लोकां कडेन उलोवन फुडलें थारतलें. मुख्यमंत्री पुराय राज्याचो म्हणून ताचे कडेन कामां करून घेतना संबंद येतात. आपूण नवो राजकारणी आसून लेगीत खंयच्या वेळार कसले निर्णय घेवचे हें आपल्याक जुस्त कळटा, अशें जीत आरोलकार हांणी फुडें म्हणलें.
प्रत्येक कंपनी उदक प्रक्रिया प्रकल्प घालचे
पेडण्यां जावं गोंयांत कसलेय प्रकल्प आयल्यार सरकारान तांकां कच्चें उदक दिवचें. प्रकल्प येता ते कंपनीन स्वताचो ट्रिटमेंट प्लांट (उदक प्रक्रिया प्रकल्प) घालून उदकाचेर स्वता प्रक्रिया करून तें वापरचें, असोय सल्लो आरोलकार हांणी दिलो. पेडण्यां आपणें तशें सुरू केलां आनी कंपनीय अशें करपाक तयार जाल्यात. पुराय गोंयभर अशें जाल्यार गोंयचो उदकाचो प्रस्न सुट्टलो. सरकार प्रक्रिया करता तें उदक लोकांक पिवपाक वा वापरपाक दिवचें. जेन्ना भायली खंयचीय कंपनी येवन धंदो करता आनी कोट्यांनी उलाढाल करता तेन्ना आपल्याक जाय त्या उदकाचेर स्वता प्रक्रिया करून तें वापरपाक कंपनींक व्हडलें न्हय, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
