भांगरभूंय | प्रतिनिधी
कोरगांव, प्रतिनिधी ः कोरगांवां जाल्ल्या अपघातांत रशियन नागरिक पीटर (59, हरमल) हाका मरण आयलें. हरमला सावन चोपड्यां वतना दुरगाचेर स्कूटर आपटून हो अपघात जाल्लो.
मेळिल्ले म्हायती प्रमाण, भटवाडी कोरगांवांत काल दनपारां सुमार 3:15 वरांचेर घराच्या दुरगाचेर स्कूटर आपटून अपघात जालो. हांतूत स्कूटर चालक गंभीर जखमी जालो. ताका हॉस्पिटलांत व्हरतना मरण आयलें. पीटर सध्या पर्यटना खातीर गोंयांत आयल्लो. कोरगांवां भाड्याच्या कुडींत रावतालो. काल दनपारां हरमला सावन चोपड्यां वतना ताका अपघात जालो. ताका उपचारा खातीर हॉस्पिटलांत व्हरतना मरण आयलें.
मजगतीं, हरमलां ते पेडणें ह्या रस्त्यार फोंडकुलां आसात आनी कांय कडेन रस्तो उंच, सकयल आशिल्ल्यान पर्यटकांक रस्त्याचो अदमास येना. देखून दर दिसा अशे अपघात घडटात. कांय वर्सां आदीं ह्या रस्त्याचे डांबरीकरण केल्ले पूण आतां ताचेर आशिल्लें डांबर गेलां. हे विशीं संबंदीत खात्यान आनी आमदार प्रवीण आर्लेकार हांणी दखल घेवन ह्या रस्त्याचे डांबरीकरण करुन घेवप खूब गरजेचें आसा, अशें थळाव्या लोकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
