पर्वरे अपघातांत दिव्यांगाक मरण
भांगरभूंय | प्रतिनिधी
पणजे सांता मोनिका जेटी लागसार कार उमथली
म्हापशें / पणजी ः राज्यांत फाटल्या कांय दिसा सावन अपघातांचें सत्र चालूच आसा. कांय जाणांनी तांतूत जीव वगडायले तर कांय जाण जखमी जाल्यात. तांचेर उपचारुय सुरु आसात. काल सुर्ला, शिर्ली आनी सुकूर पर्वरे जाल्ल्या तीन अपघातांनी तिगांक मरण आयलें. हाची चर्चा राज्यांत चालूच आसा म्हणसर आयज फातोडेंर पर्वरे जाल्ल्या अपघातांत एकल्याक मरण आयलें.
पर्वरीच्या डॉल्फिनोस सुपरमार्केटा लागसार जीपीन स्कुटरीक फाटल्यान धपको दिल्ल्यान जाल्ल्या अपघातात दिव्यांग दुचाकी चालकाक मरण आयलें. किट्टू काशिनाथ बेहरा (51, शेट्येवाडो, म्हापशें) अशें मरण आयिल्ल्याचे नांव आसा. ह्या प्रकरणांत नरेश कांतीलाल जैन (41, वाशी पालघर) हाका पुलिसांनी ताब्यांत घेतला.
बेहराच्या खाशेल्या तीन चाकी गाडयेक थार जीपीन धपको दिल्ल्यान हो अपघात जालो. बेहरा हो नुस्तें विक्रेतो सदचे भशेन आयज फातोडेर साडे चार वरांचेर जीए- ०३ एसी- ८८२९ क्रमांकाचे खाशेले तीन चाकी गाडयेंतल्यान नुस्तें हाडपाक म्हापशें सावन बेती वचपाक भायर सरलो. त्याच वेळार जीए- ०३ झेड- ६१८८ क्रमांकाची महिंद्रा थार जीप पणजे वटेन वताली. जिपीन बेहराच्या तीन चाकी गाडयेक फाटल्यान धपको दिलो. उपरांत मुखार जिपीचो धपको बसून लायटीचो खांबो मोडलो. जिपींत पालघरांतले (महाराष्ट्र) तीन पर्यटक आशिल्ले. ही जीप खाजगी मालकीची आसून ती ह्या पर्यटकांक भाड्यान दिल्ली.
हे घडणुकेची म्हायती मेळ्ळ्या उपरांत पर्वरे पुलीस घडणूक सुवातेर पावलें. जखमी बेहराक जीएमसींत व्हेलो. दाखल केलो. पूण दोतोरांनी ताका मरण आयिल्ल्याचें जाहीर केलें.
मजगतीं, आयज सकाळीं सुमार 8.15 वरांचेर पणजेच्या सांता मोनिका जेटी लागसार रस्त्याच्या कुशीक आशिल्ल्याक डिव्हायडराक धपको दिल्ल्यान कार उमथली. हांतूत कोणाक कांय जावंक ना. ह्या अपघातांक लागून कांय वेळ हे सुवातेर येरादारीची कोंयडी जाली. म्हायती मेळटाच पुलिसांनी घडणूक सुवातेर येवन येरादारी सुरळीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
