भांगरभूंय | प्रतिनिधी
दिवचल: सांखळे मतदारसंघांतल्या सुर्ल पंचायतीचो आदलो पंच वांगडी गांवकारवाडो सुर्लाचो प्रशांत रघुनाथ नायक गांवकार (59) हांकां दनपारां घडिल्ल्या आपचलीत अपघातांत मरण आयलें. सुर्ला दूद सोसायटी कुशिकूच रस्त्यारूच म्हशी आडव्यो आयिल्ल्यान तांकां अपघात जालो. अशी म्हायती मेळ्ळ्या.
हो अपघात दनपारां देड वरांच्या सुमाराक घडलो. आपल्या जीए 05 एन 1383 क्रमांकाचे होंडा ग्रेझिया ह्या दुचाकीन येता आसतना रस्त्यार अचकीत म्हशी आयल्यो. तांकां नेटाचो धपको दिले उपरांत ते दुचाकी सयत रस्त्यार पडले. गंभीर जखमी अवस्थेंत तांकां हॉस्पिटलांत व्हरतकूच दोतोरांनी तांकां मरण आयिल्ल्याचें जाहीर केलें.
दिवचल पुलिसांनी घडणूक थळार धांव घेवन पंचनामो केलो. पुलीस निरिक्षक दिनेश गडेकार हांच्या मार्गदर्शना खाला उपनिरिक्षक विराज धावस्कार फुडलो तपास करतात. मयत प्रशांत नायक गांवकार हे पंच वांगडी सुचिता गांवकार हांचे घरकार आशिल्ले. ते एक उत्कृश्ट समाजीक कार्यकर्ते म्हणून तांची वळख आशिल्ली. तांकां दोन पूत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
