भांगरभूंय | प्रतिनिधी
पणजी: राज्यांतल्या हवामानाचो अदमास आतां अचूक जातलो. हवामान खात्याचें साळगांवां आपचलीत हवामान केंद्र (एडब्ल्यूएस) हालींच चालीक लागलां. जाल्यार मंगेशी रोखडेंच अशें नवें केंद्र येतलें. गोंय हवामान विज्ञान केंद्राचे निर्देशक नहूश कुलकर्णी हांणी ही म्हायती दिली. खात्याच्या 150 व्या वर्धापन दिसा निमतान सोमारा केंद्रां वतीन विद्यार्थ्यां खातीर विवीध कार्यावळींचें आयोजन केल्लें.
साळगांवां राज्य जैवविविधताय मंडळाच्या प्राकारांत एक एडब्ल्यूएस बसयला. हाका लागून ह्या वाठारांतल्या तापमाना सयत हेर चार वातावरणीय म्हायती एकठांय करतले. जाल्यार मंगेशी देवळा कुशीक नवें एडब्ल्यूएस लायतले. तशेंच केंद्रा वतीन मोपा विमानतळ वाठारांत डीसीडब्ल्यूआयएस प्रणाली लायल्या. हातूंतली उपकरणां आंतरराष्ट्रीय पांवड्यार एकॉव कावन्सिला कडल्यान मान्यताय प्राप्त आसात. हे वरवीं हांगाचे हवाई येरादारीक मजत जायत आशिल्ल्याचें कुलकर्णी हांणी सांगलें.
विमान उड्डाण घेतना हवामानाचे कांय निकश तपासप गरजेचें आसतात. हातूंत तापमान, हवेचो दाब ह्यो गजाली म्हत्वाच्यो आसतात. विमान देंवतना नेमके खंयचे सुवातेर लॅण्ड करप हें लेगीत तापमान आनी हवेच्या दाबार थारायतात. आमी डीसीडब्ल्यूआयएस वरवीं ही म्हायती एकठांय करतात. उपरांत मेळिल्ले म्हायतीचेर शास्त्रीय प्रक्रिया करून विमानतळाक धाडटात. सद्या आमी दर अर्द वराक मोपा विमानतळाक ही म्हायती दीत आशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
