भांगरभूंय | प्रतिनिधी
मडगांव: लोकसभा वेंचणुकेंत काँग्रेसीची उमेदवारी कोणाक दिवप हाचो निर्णय पक्ष घेता. उमेदवार रोखडोच जाहीर करपाची मागणी राज्यांतल्या पदाधिकाऱ्यांनी केल्या. ते प्रमाण दिल्लींतल्यान स्क्रिनींग समिती रोखडीच गोंयांत येतली. ती इत्सूक उमेदवारा कडेन चर्चा करतली आनी उपरांत समिती आनी पक्षा कडल्यान उमेदवारांची घोशणा जातली अशें विरोधी पक्ष फुडारी युरी आलेमांव हांणी सांगलें.
येता ते लोकसभा वेंचणुकेचे फाटभुंयेर विरोधी पक्ष फुडारी तशेंच काँग्रेसीचे आमदार युरी आलेमांव हांणी उमेदवारांची पारखणी आनी पडटाळणी खातीर दिल्लींतल्यान स्क्रिनींग समिती येतली अशें सांगलें. लोकसभा वेंचणुके खातीर उमेदवार थारावपाची आनी तिकेट कोणाक दिवप हें थारावपा खातीर काँग्रेस पक्षाची एक प्रक्रिया आसता.
पक्षाचें नवे प्रभारी माणिकराव ठाकरे हांणी राज्यांतल्या सगल्या गट काँग्रेस समितीच्या अध्यक्षां कडेन चर्चा केल्या. जिल्हो समितीच्या पदाधिकाऱ्यांच्यो भेटी घेतल्यात. त्या वेळार पक्षान उमेदवाराची निवड रोखडी करची अशी मागणी केल्या. हाचे पयलीं दिल्लींतले परिशदे खातीर गेल्लों तेन्नाय ह्या विशयाचेर पक्षाच्या वरिश्ठ फुडाऱ्यां कडेन चर्चा केल्या, आनी रोखडीच उमेदवारांच्या नांवांची घोशणा करपाची विनंती केल्या अशें युरी आलेमांव हांणी सांगलें.
पक्षाची उमेदवार पारखणी खातीरची समिती रोखडीच नवी दिल्लींतल्यान गोंयांत दाखल जातली. त्या वेळार राज्यांतले लोकसभा वेंचणुके खातीर इत्सूक आशिल्ल्या काँग्रेस उमेदवारां कडेन चर्चा करतले. उपरांत पडटाळणी समिती आनी पक्षा कडल्यान लोकसभा वेंचणुके खातीर उमेदवारांची घोशणा करतले अशें विरोधी पक्ष फुडारी आनी कुंकळ्ळीचे आमदार युरी आलेमांव हांणी सांगलें.
वेंचणूक लडोवपाक इत्सूक: सार्दीन
चांदरा एका शाळेच्या मैदानाचे उक्तावण कार्यावळींत फ्रान्सीस सार्दीन हांणी परतून एकदां आपूण वेंचणूक लडोवपाक इत्सूक आशिल्ल्याचें लोकां मुखारूच सांगलें. आपणें कांय करप ना आनी दुसऱ्या कडेन बोट दाखोवपाचें काम कांय जाण करतात. 42 लाखांचें काम आतां मेरेन केलां आनी ते खातीरूच आतां शाळेच्या मैदान प्रकल्पाचें उक्तावण केलां. पक्षा कडल्यान आपणाक लोकसभा वेंचणुके खातीर तिकेट दिल्यार आपूण इत्सूक आसा. पक्षान तिकेट दिल्यार परतून तेंक्या खातीर लोकां कडेन वतलों अशेंय सार्दीन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
