स्मार्ट सिटीचीं कामां 31 मे 2024 मेरेन पूर्ण
भांगरभूंय | प्रतिनिधी
बाबुश मोन्सेरात हांचें उतर, कामाच्या दर्जा विशीं म्हाका सारकें खबर ना
पणजी, प्रतिनिधी : मंत्री बाबुश मोन्सेरात हांणी सोमारा मधुबन सर्कल ते काकुलो मॉल मेरेन सुरू आशिल्ल्या कामांची पळोवणी केली. ह्या वेळार तांणी 31 मे 2024 मेरेन स्मार्ट सिटीचीं सगलीं कामां पुराय जातलीं, अशें सांगलें. ह्या वेळार स्मार्ट सिटीचे मुख्य कार्यकारी अधिकारी संजीत रॉड्रिग्ज आनी हेर अधिकारी हाजीर आशिल्ले.
स्मार्ट सिटी खाला रस्त्याचीं, घाणयार्या उदकाचीं पायपां बसोवप आनी हेर रस्त्या पोंदच्यो सरयो घालपाचीं कामां सुरू आसात. पूण रस्त्या सकयल कितें केलां हें आपल्याक खबर ना. ताका लागून कामांच्या दर्जा विशीं आपूण कांयच उलोवपाक शकना. पूण सध्या 31 मे 2024 मेरेन कामां पुराय करपाक प्राधान्य दिलां. कामांचो आढावो घेवपा खातीर फाल्यां मुखेल सचिवां वांगडा बसका घेतले. हे बसकेक सगळ्या कंत्राटदारांक आपयल्यात, अशें मंत्री मोन्सेरात हांणी सांगलें.
फाल्यांची बसका जाले उपरांत पणजी महानगरपालिका अधिकार्यांची बसका घेतले. उपरांत शारांतल्या रस्त्या वयलीं सगळीं अतिक्रमणां काडून उडयतले. नागरिकांची गैरवेवस्था जावची न्हय देखून आमी एका वेळार एकाच रस्त्यार कामां पुराय करपा खातीर यत्न करतले. मात, स्मार्ट सिटीचीं कामां पुराय जाय मेरेन नागरिकांनीय सहकार्य करप गरजेचें, अशें तांणी म्हणलें.
हाचे पयलीं स्मार्ट सिटीच्या सगळ्या कामां वयल्यान आरोप- प्रत्यारोप चालूच आसात. उत्पल पर्रीकार आनी मंत्री बाबुश मोन्सेरात हांणी एकामेकांचेर टिका केली. हातूंत आदले मुख्यमंत्री मनोहर पर्रीकार हांचेंय नांव आयलें. उपरांत मुख्यमंत्री डॉ. प्रमोद सावंत हांणी अप्रत्यक्षपणान दोगांयकूय शांत रावपाचो सल्लो दिल्लो. उपरांत सोमारा मोन्सेरात हांणी स्मार्ट सिटीच्या कामांची पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
