भांगरभूंय | प्रतिनिधी
म्हापशें, प्रतिनिधीः सुकूर पर्वरेचे देंवतेर दोन दुचाकीं मदीं जाल्ल्या अपघातांत राहुल खडपे (३१, रा. सुकूर) हाका आक्ताक मरण आयलें. जाल्यार रितेश कांबळी (४६, रा. सुकूर) हो गंभीर जखमी जाला. ताचेर जीएमसींत उपचार चालू आसात.
हो अपघात आयतारा १४ जानेवारीक रातच्या ११.१५ वरांचेर जालो. पुलिसांनी दिल्ले म्हायतीप्रमाण, राहुल आपल्या मोटारसायकली वयल्यान सुकूर चर्ची कडल्यान पंचायत घराचे दिकेन वतालो. जाल्यार जखमी रितेश हो विरोधी दिकेन येतालो. दोनूय दोनचाकी देंवतेर पावल्यो तेन्ना राहुल हांणे चुकीचे दिकेन मोटारसायकल व्हरून कांबळी हांचे मोटरसायकलीक धपको दिलो. हातूंत दोगूय जखमी जाले. तांकां रोखडेच ऍम्बुलन्सीन जीएमसींत व्हेले. तेन्ना राहुल हाका मरण आयिल्ल्याचें दोतोरांनी सांगलें.
अपघाताची म्हायती मेळटांच पर्वरी पुलिसांनी घडणुके सुवातेर वचून पंचनामो केलो. सोमारा सकाळीं पोस्टमार्टमा उपरांत राहुल हाची कूड तांच्या कुटुंबाचे सुवादीन केली. राहुल हो एके खाजगी बँकेंत काम करतालो. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
